(کابل ټکی کام ۱۳۹۵ زمری ۱۷) زرغون خوږیاڼی
د بلجیم په چارلیریو ښار کې یو برید ګر پر ښځینه پولیس افسرانو د چاړه برید کړی او ۲ پولیس افسرانې یې ټپي کړي دي.
د بلجیم د چارواکو په وینا، یو کس چې چاړه یې په لاس کې وه په چارلیریو ښار کې د الله اکبر په غږ سره په دوه ښځینه پولیس افسرانو برید وکړ، چې دواړه پولیسې ټپیانې شوي دي.
چارواکو ویلي، چې یوه پولیسه پر مخ وهل شوې او روغتیايي حالت یې خراب ښودل شوی دی.
یادې ټپي پولیسانې ځايي روغتون ته لیږدول شوي.
د پولیسو په وینا، برید ګر د پولیسو په ډزو له ټپي کیدو وروسته مړ شوی دی.
ځايي پولیسو ویلي، چې برید د پولیسو دمرکز نه بهر په ولاړو پولیسانو شوی دی
له پېښې وروسته پوليسو سيمه کلابنده کړې ده.
تر اوسه چا د یاد برید مسوولیت نه دی منلی.
