طالبان: په بدخشان کې یې شپږ مهمې پوستې او په کندز کې یې ستر پوځي پنډغالی نیولي

کابل ټکی کام: زمری ۱۷مه ۱۳۹۵ل، بصیراحمد پاڅون
نن سهار طالبانو په یوه خپره کړي خپرپاڼه کې ویلي: د عمري عملیاتو په توند بهیر کې تیره شپه د بدخشان ولایت تګاب ولسوالۍ شیدکان او خنبک آب سیمو کې چې د ولسوالۍ له مرکز سره نیږدې موقعیت لري، د دښمن په پوستو پراخ تعرضي عملیات ترسره شول.
په جګړه کې له دښمن څخه ۶ مهمې پوستې فتحه شوې، ۷ تنه عسکر ووژل شول چې جسدونه يې پراته دي، ۹ تنه ټپيان شول، ډيره اندازه سپکه او درنه وسله، مهمات او نظامي توکي مجاهدینوته په غنیمت پاتې شول.
په نښته کې ۲ تنه مجاهدين دشهادت لوړ مقام ته ورسیدل.
بل پلو دکندز ولایت دامام صاحب د محاصره شوي ولسوالۍ له مرکز سره نیږدې په کول ارباب خیل او پاکستاني پول سیمو کې د دښمن په مراکزو او پوستو بریدونه ترسره شول.
په نښته کې چې د شپې تر ناوخته روانه وه له دښمن څخه یوه مهمه نظامي قرارګاه په ټولیزه توګه فتحه شوه، ۹ تنه عسکر يې په کې ووژل شول چې د ۴ تنو جسدونه په سیمه کې پاتې دي، ګڼ نور ټپيان شوي هم دي چې په امبولانسونو کې انتقالیدل.
د دغو عملیاتو په لړ له دښمن څخه ډیره سپکه او درنه وسله ، مهمات او نظامي توکي هم په غنیمت نیول شوي او قرارګاه د مجاهدینو په ولکه کې .
د دفاع او کورنیو چارو وزارتونو د طالبانو د دې ادعاو په اړه تر اوسه رسنیو ته څه نه دي ویلي خو د ۲۰۹ شاهین قول اردو قوماندان جنرال مهمند کټوازي ویلي چې د سرپل او فاریاب ولایتونو په کوهستاناتو او نورو نا امنه ولسوالیو کې به ډیر ژر چاڼیز عملیات پیل او دا سیمې به له طالبانو خالي کړي.
طالبان په داسې مهال د خپلو پرمختګونو ادعا کوي چې تیره شپه یې د هلمند ګرمسیر ولسوالۍ د لکۍ په سیمه کې دوې پوستې هم نیولي او لس تنه عسکر یې وژلي دي.
دکندهار میوند ولسوالۍ دبندتیمور دحاجي خیلو په سیمه کې هم د درنې جګړې راپور ورکړل شوی او ویل کیږي چې طالبانو یوه پوسته نړولي ۹ تنه عسکر او یو ټانک یې له منځه وړي او شپږ تنه عسکر ټپیان کړي دي.