(کابل ټکی کام ۱۳۹۵ زمری ۱۷) زرغون خوږیاڼی
سرچینې: جنرال عبدالرشید دوستم ته د لومړي مرستیال له څوکۍ څخه د تېرېدو په بدل کې د امنیتي ادارو د رهبرۍ وړاندیز شوې دی.
امریکا هڅه کوي، چې د ګډ حکومت د دوام لپاره متبادلې لارې ولټوي، امریکا وړاندیز کړی، چې اجرائیه رئیس عبدالله به د ولسمشر اشرف غني مرستیال وټاکل شي او دوستم ته به په بدل کې د ملي دفاع، ملي امنیت او کورنیو چارو وزارت د رهبرۍ واګي په لاس کې ورکړل شي.
ویل شوي، چې د اجرائیه په نوم نوی زیږیدلی بست به ختم شي.
خو د جنبش ګوند ویاند دغه موضوع په کلکه ردوي او وایي، چې جنرال دوستم د خلکو د رایې پراساس ټاکل شوی او تر پنځو کلونو پورې به په خپله څوکۍ پاتې وي.
د یادونې وړ ده، د ګډ حکومت، چې د سیاسي تفاهم لیک پر اساس یې کاري موده د وږې په میاشت کې پای ته رسیږي اوس هڅه کیږي چې د دوام لپاره یې نوې لارې چارې ولټول شي.
ویل کیږي افغان چارواکي د حکومت د خپل برخلیک لپاره د لویې جرګې په دایرولو کې پاتې راغلي او اوس امریکا هڅه کوي حکومت ته د مشروعیت ورکولو لپاره د نظام په جوړښت کې خپلسري بدلون راولي.
دا پریکړه په داسې حال کې کیږي،چې څو ورځې وړاندې د بشري حقونو د څار ادارې په یو راپور کې وویل، چې د دوستم ملیشو په جګړو کې ملکي خلک وژلي.
