د شپږیزې سیالۍ لومړۍ لوبه کې بند امیر سپین غر بازانو ته ماتې ورکړه
(کابل ټکی کام ۱۳۹۵ زمری ۱۹) زرغون خوږیاڼی
نن د زمري په ۱۹ د کرکټ شل اوریزې شپږیزې سیالۍ کې د مرکزي زون بند امير لوبډلې د ختيځ زون سپين غر لوبـډلې ته ماتې ورکړه.
دا لوبې د هیواد د ۵ زونونو لوبډلو لخوا د کابل په الکوزي نړيوال کرکټ لوبغالي کې پيل شوې دي.
ددې سیالیو لومړۍ لوبه د بند امیر او سپین غر بازانو تر منځ ترسره شوه، چې بند امیر بریا تر لاسه کړه.
د افغانستان د کرکټ بورډ وياند فريد هوتک وويل، چې د دې لوبې پچه د سپين غر کپتان حميد حسن وګټله، خو لومړى يې د بند امير لوبډلې ته د لوبې بلنه ورکړه.
د بند امير لوبډلې په ٤٥ منډو کې څلور پياوړي لوبغاړي له لاسه ورکړل، خو وروسته لوبه حشمت الله شهيدي او نبي عيسى خېل په زړه پورې کړه او د خپلې لوبډلې منډې يې په ٢٠ اورونو کې ١٦٤ ته يې ورسولې او سپين غر ته يې د ١٦٥ منډو هدف ورکړ.
نبي عيسى خېل د شپږو شپږيزو پر وهلو بریالی شو او ٨٣ منډې یې جوړې کړې،همدارنګه حشمت الله شهيدي ٥٠ منـډې جوړې کړې.
د سپين غر توپ اچوونکو له خوا افتاب عالم ۳، فريد ملک او ظاهر شېرزاد يو يو لوبغاړي وسوځول.
د سپين غربازانو ښه لوبه ونه کړه او ياد هدف یې ترلاسه نه شو کړاى او ټوله لوبډله يې په ۱۹ اوورو کې په ١٢٣ منډو وسوځېدله.
د بند امير له لوري نوين الحق ۳ او نصرت الله ۲ لوبغاړي وسوځول او د ۴۱ منډو په توپير یې دا لوبه وګټله
نن به دويمه لوبه د امو او کابل بازانو ترمنځ ترسره کېږي، د لوبې پچه اضغر ستانکزي وکټله او خپله یې د توپ وهنې پرېکړه وکړه.
