افغانستان د بروکسل غونډې ته د ناڅرګند برخلیک په تمه
د یوې اوونۍ راپد ېخوا دولت د بروکسل غونډې ته په خپل چمتو والي بوخت دی.
اجرائيه رئيس ډاکټر عبدالله تیره ورځ په کابل کې یوې مطبوعاتي غونډې ته وویل: دولت له ولس سره ژمنې کړي دي او د خپلو کړو ژمنو د پوره کولو لپاره د بروکسل غونډې ته چمتوالی نیسي.
د ملګروملتونو لخوا وخت په وخت د افغنستان په اړه په بروکسل کې غونډه کیږي او له افغان دولته د حکومتولۍ روڼ حساب، د قانون په حاکمیت کې لازم قدمونه، د ښې حکومتولۍ اړونده کارونه او بیلګې، له فساد ضد مبارزې لاس ته راوړنې، د ښځو د حقوقو په اړه رغنده رول، د بشرد حقوقو تامین او د ښې حکومتولۍ لپاره د ظرفیتونو د لوړوالي په اړه معلومات غوښتل کیږي، چې له ارزونې وروسته ملګري ملتونه د افغانستان په اړه د برخلیک ټاکلو پریکړه کوي.
ډاکټر عبدالله په کابل کې خبري غونډه کې بروکسل غونډې ته د خپل چمتو والي ډاډ ورکړ؛ خو د حکومتولۍ څخه نیولې تر امنیتي حالاتو پورې ټولو برخو کې د بروکسل په غونډه کې د پوښتنو ځواب ځکه نه شي ویلی، چې د تیر کال په نسبت په سږني کال کې دولت د ګړنګ پر سر ولاړ دی.
دولت چې د واک ترلاسه کولو په سر کې د نړیوالې ټولنې او افغان ولس سره کومې ژمنې کړې وې، یوه ېې هم نه ده پوره کړې.
د افغانستان په اړه د بروکسل غونډه د راتلونکي اکتوبر په څلورمه او پنځمه نیټه په بلجیم کې جوړیږي، چې کوربه توب به ېې د اروپایي ټولنې په غاړه وي.
افغان چارواکي د بروکسل برخلیک ټاکونکې غونډې ته ډیر لیواله دي، چې که د افغانستان سره په غونډه کې د۷۰هیوادونو مشران او استازي د مالي او سیاسي بحث وروسته څه نتیجې ته ورسیږي، د افغانستان په اقتصاد کې به نوې ساه وچلیږي او که روڼ حساب ورنه کړل شو، بیا خو په تش لاس هیڅ نه کیږي. دولت د بروکسل غونډې ته زیاته تمه لري، چې له ۲۰۱۷څخه تر۲۰۲۰ میلادي کال پورې به نړیوالې مرستې ترلاسه کړي.
د افغان چارواکو کړنو ته چې وکتل شي، نړیوالې ټولنې او افغان ولس سره ېې کړې ژمنې نه دي ترسره کړي، نو ستونزمنه ده چې ولسمشر او اجرائیه رئیس د خپلو اختلا فاتو په نتیجه کې د بروکسل غونډې قناعت بښونکي ځوابونه ووايي او هغه څه لاس ته راوړي کوموته چې دوی سترګې په لاره دي.
