د طالبانو پر روانو پراخو بریدونو، عبدالله عبدالله سخته اندېښنه ښودلې

کابل ټکی کام ۰۱وږي/۱۳۹۵، احمدالله مهاجر
له تېرې یوې میاشتې راهیسې د هېواد په مختلفو سیمو کې طالبانو پراخ عملیات پیل کړي دي، چې یو شمېر ولسوالۍ، پوستې او پراخې سیمې یې یا تر ولکې لاندې راوستې او یا یې تر کلکې محاصرې لاندي راوستي دي.
طالبانو په کندوز، بدخشان، ننګرهار، تخار، هلمند، نورستان او پکتیا ولایتونو کې پراخ کنټرول ترلاسه کړی، او د جلب او جذب پروسه یې هم په کار اچولې ده، چې د حکومت پر خلاف یې عام ملکي وګړي هم وسله په لاس کړي دي.
اجرائیه رئیس عبدالله عبدالله نن د وزیرانو د شورا په غونډه کې د طالبانو روان بریدونه د «دښمنانو د پراخو بریدونو څپه» ونومول او سخته اندېښنه یې پرې څرګنده کړه.
عبدالله عبدالله ژمنه وکړه، چې ډېر ژر به د «دښمنانو د بریدونو» مخه ونیسي.
عبدالله عبدالله دا څرګندونې داسې مهال کوي، چې په دې وروستیو کې د ده او د ارګ ترمنځ اختلافات را پیدا شوي دي.
د سیاسي چارو کارپوهانو د طالبانو د روانو جګړو د پراختیا لامل د ارګ او اجرائیه ریاست اختلافات بولي.
د یادولو ده، د طالبانو روان عمري عملیات د هېواد په ګڼو ولایتونو کې درندې جګړې پیل کړي دي، چې تراوسه پورې افغان ځواکونو ته سخت ځپوونکي تمام شوي دي.