(کابل ټکی کام ۱۳۹۵وږی ۱۴) الماس خدرخېل
د افغانستان ملي دفاع وزارت د هند هېواد نه د پوځي تجهيزاتو غوښتنه کړې، خو تر اوسه لا معلومه نه ده، چې ياد هېواد به دغه تجهيزات افغانستان ته ورکړي او که نه.
سيمييزو رسنيو ويلي، چې هند به د يوې میاشتې په موده کې څرګنده کړي، چې پوځي تجهيزات افغانستان ته ورکوي او که نه.
بل پلو دفاع وزارت هم ياده مسله تائيدوي، خو دا يې نه دي ويلي چې هندي دولت ته يې سپارل شوي نوملړ کې کوم تجهيزات غوښتي.
ويل کېږي، چې په يادو تجهيزاتو کې دفاع وزارت د هندي چارواکو نه د سپکې او درنې وسلې تر څنګ د توپچي غوښتنه هم کړې ده.
د افغانستان لوی درستيز هند کې دی او د هندي رسنيو په وينا، لومړي وزير ته نږدې چارواکو ويلي، چې هند د افغانسان حکومت دغې غوښتنې ته مثبت ځواب ويلی دی.
د ملي دفاع وزارت د وياند مرستيال محمد رادمنش وايي: د افغانستان سره د هند مرستې د پوځي زده کړو او پوځي تجهيزاتو په برخه کې دي، دی وايي چې مونږ هيله لرو ترڅو په اينده کې هند هغه مرستې وکړي چې لا پخوا يې د رسنيو له لارې ژمنه کړې وه.
پوځي شنونکی زلمی وردګ وايي: که دغه مرستې افغانستان ته راوړل شي، څرګنده ده چې پاکستان به له هند سره دښمني لري او همدا لامل کېږي، چې د ناسم سياست له کبله به افغانستان د دې دواړو هېوادونو تر منځ د جګړې په ډګر بدلېږي او د کشمير تاريخ به يو ځل بيا دلته تکرار شي.
د يادونې ده، چې د کرزي د حکومت په وخت کې هند ته دپوځي تجهيزاتو يو بل نوملړ هم سپارل شوی و، خو کومه نتيجه يې نه وه ورکړې، ويل کېږي چې هند د دفاع وزارت سره د څلورو جنګي چورلکو، پوځي زده کړو تر څنګ د افغان دولت په نورو برخو کې هم مرستې کوي.
