سیاسي چارو شنونکي: د سنبلې په ۲۸مه د ګډ حکومت مشروعیت ختمیږي

 (کابل ټکی کام ۱۳۹۵ وږی ۱۵)زرغون خوږیاڼی

 په یو غیر قانوني او خارجي جوړجاړي سره د جوړ شوي ګډ حکومت مشروعیت په نږدې ورځو کې پای ته رسیږي، د ګډ حکومت په سیاسي تفاهم لیک کې ویل شوي وو، چې په دوو کلونو کې به د ګډ حکومت مشروعیت لپاره یوه لویه جرګه جوړیږي او یا به په یاد وخت کې د ولسي جرګې ټاکنې ترسره کوي.

 دا په داسې حال کې ده، چې په تېرو دوو کلونو کې ټاکنې ونه شوې او ګد حکومت د مشروعیت لپاره د اساسي قانون لویه جرګه هم جوړه نه شو، د شنونکو په وینا، نور افغانان د ګډ حکومت په نوم کوم نامشروع دوه سری حکومت نه پيژني.

د سیاسي چارو شنونکو په اند، د ګډ حکومت د سیاسي تفاهم لیک موده د روانې وږې یا سنبلې میاشتې په اته وېشتمه ختمیږي او تر هغې وروسته د ګډ حکومت( ملي وحدت!) مشروعیت نه لري.

شنونکي وايي، یوازې هغه حکومتونه تر پنځو کلونو دوام کوي، چې د اساسي قانون پر اساس رامنځ ته شوي وي او له دوه سري حالت سره مخ نه وي.

د چارو شنونکی شهزاده مسعود وايي، چې د ملي یووالي حکومت د خپل مشروعیت د معلومولو لپاره کړې ژمنې عملي نه کړې او تر راتلونکو څو اونیو پورې به یې مشروعیت ختم شي.

د پوهنتون استاد طاهر هاشمي وايي، په تیرو دوو کلونو کې د ګډ حکومت د مشرعیت او قانوني کولو لپاره   لویه جرګه جوړه نه شوه او نه هم د ولسي جرګې ټاکنې وشوې، نو د سیاسي تفاهم لیک د دویم کال په پوره کېدو سره اوسنی حکومت خپل نسبي مشروعیت هم له لاسه ورکوي.

د هغه په وینا، د ملي یووالي حکومت د اساسي قانون خلاف د یوه کمزوري سیاسي سند پر اساس رامنځ ته شو او د حکومت د مشروعیت موده هم تر دوو کلونو پکې تسجیل شوې ده.

بلخوا د اجرائيه رئيس عبدالله بیا سیاسي تفاهیم لیک نه مني او نه هم د دوه سري حکومت مشروعیت ته کوم ارزښت ورکوي.

 اجراییه ریاست وايي، چې په سیاسي تفاهم لیک کې دوه کلن زماني قید یوازې د لویې جرګې لپاره راغلی او که د اساسي قانون د تعدیل لویه جرګه جوړه هم نه شي، د ملي یووالي حکومت به په همدې ډول تر پنځو کلونو دوام وکړي.

د سیاسي چارو شنونکي وايي، چې د دوه سري حکومت مشران په تیره دوه کلنه دوره کې یواځې په خپلمنځي اختلافاتو کې راګیر و او د واک نیم په نیم ویشلو کې یې سره ژور اختلافات درلودل، نه خو یې د ملت لپاره کوم خدمت وکړ او نه یې د خپل دوه سري حکومت مشروعیت لپاره کړې وعدې عملي کړې.