د غزني ولایتي شورا: د ګیرو په ولسوالۍ جګړه روانه ده، ۴ پوستې طالبانو نیولي
(کابل ټکی کام ۱۳۹۵ وږی ۱۵) زرغون خوږیاڼی
دغزني ولایت امنیتي چارواکي وایي، چې د دغه ولایت د ګیرو په ولسوالۍ کې د افغان امنیتي ځواکونو او وسله والو طالبانو ترمنځ سخته جګړه روانه ده.
د غزني د ولایتي شورا یو شمیر غړي وایي، نن سهار راهیسې د ګیرو په ولسوالۍ جګړه سخته شوې ده، ۴ مهمې امنیتي پوستې طالبانو نیولي دي.
ددوي په وینا که په وخت دغې ولسوالۍ ته تازه دمي عسکر وانه ستول شي، ولسوالۍ به د طالبانو لاسته ولویږي. دوی وايي چې طالبانو د ګیرو د ولسوالۍ د جګړې لپاره د زابل او پکتیکا ولایتونو څخه هم وسله وال استولي دي.
د غزني د ولایتي شورا یو غړي عبدالجامع امریکا غږ اشنا راډیو ته وویل، چې شاوخوا پنځه سوه وسله والو طالبانو تیره شپه د ګیرو په ولسوالۍ کې د افغان امنیتي ځواکونو په پوستو بریدونه پیل کړي دي.
ښاغلي جامع وویل” د ګیرو په ولسوالۍ کې تراوسه طالبانو ۴ مهمې پوستې نیولي دي، که چیرې دغې ولسوالۍ ته ځانګړي ځواکونه وانه ستول شي نو دا ولسوالۍ به سقوط وکړي “.
د غزني د اندړو ولسوالۍ سیمه ایز چارواکي وایي،وسله والو طالبانو نن سهار د ګیرو په ولسوالۍ باندې د خپلو عملیاتو لپاره د کابل – کندهار او غزني- پکتیکا لارې بندې کړي دي.
د غزني د ولایت د اندړو ولسوال قاسم دیسوال ویلي، چې طالبانو غوښتل د لارې په بندولو سره په اندړو ولسوالۍ کې افغان ځواکونه مصروف وساتي او په دې توګه د ګیرو په ولسوالۍ خپل فشار لا زیات کړي.
قاسم دیسوال وايي، چې اوس لاره بیرته پرانیستل شوې ده.
د غزني ولایت د امنیت امر سمونوال اسدالله شجاعي په ګیرو ولسوالۍ دطالبانو جګړه تائيدوي؛ خو دی وايي، چې ولسوالۍ تر اوسه د حکومتي ځواکونو په لاس کې ده.
د غزني ولایت د امنیت امر سمونوال اسدالله شجاعي امریکا غږ ته وویل چې په ګیرو ولسوالۍ کې سخته جګړه روانه ده او تراوسه لا هم دا ولسوالۍ د افغان ځواکونو په لاس کې ده.
هغه په دې هکله له نورو څرګندونو ډډه وکړه.
تراوسه د ګیروپه ولسوالۍ کې په روانو جګړو کې دواړو خواو ته د پیښې شوې مرګ ژوبلې په اړه معلومات نشته او طالبانو هم په دې اړه رسنیو ته څه نه دي ویلي.
