د لغمان کرکټ ټيم د دوه ورځنيو سياليو اتل شو
(کابل ټکی کام ۱۳۹۵وږی ۲۰) الماس خدرخېل
دا لوبې د ننګرهار ولايت په غازي امان الله خان لوبغالي کې ترسره شوې، چې پکې د هېواد په کچه ۸ لوبډلو برخه اخيستې وه.
دوه ورځنۍ وروستۍ سيالۍ ته د لغمان او پکتيا لوبډلو لاره پيدا کړې وه، چې د لغمان په ګټه پای ته ورسېده.
په وروستۍ لوبه کې پچه د لغمان لوبډلمشر وګټله او د پکتيا لوبډلې ته يې د توپوهنې چانس ورکړ.
د ټولو لوبغاړو په سوزېدلو سره پکتيا لوبډلې ۲۰۷ منډې وکړې، چې د لغمان لوبډلې ورته په ډېرې اسانۍ سره ۲۴۱ منډې جوړې کړې.
په دوهمه ورځ بيا پکتيا د لغمان لوبډلې ته ۱۷۵ منډې هدف کېښود چې لغمان ياد هدف ترلاسه او سيالي د لغمان په ګټه پای ته ورسېدله.
د ټول ټورنمنټ غوره توپ وهونکی وحيدالله شفق شو، چې ۳۷۲ منډې يې جوړې کړې وې.
او د ټورنمنټ د غوره لوبغاړي جايزه فضل نيازي واخيسته، چې توپ وهنه او توپ اچونه کې ښه ځلېدلی و.
