کاپيسا: ماين چاودنې ۱۱ افغان ځواکونو ته مرګ ژوبله اړولې
(کابل ټکی کام ۱۳۹۵وږی ۲۷) الماس خدرخېل
په کاپيسا ولایت کې تېره ورځ د پوليسو په ځانګړې قطعې په سرتېرو د ماين چاودنه شوې.
د کاپيسا د امنيې قوماندانۍ وياند نقيب الله اميني وايي< چې د امنيې قوماندانۍ د ځانګړو ځواکونو ځيني سرتېري نجراب ولسوالۍ ته خپلې دندې ته روان و، چې له يادې ولسوالۍ سره نږدې د سړک غاړې د ماين چاودنه پرې شوې ده.
د نوموړي په وينا، په دې چاودنه کې د پوليسو د ځانګړې قطعې درې سرتېري وژل شوي او مرستيال يې ټپي شوی دی.
بل خوا د سيمې يو شمېر اوسېدونکي وايي، په ياده پېښه کې په ولسي جرګه کې د کاپيسا د خلکو استازي ميرداد نجرابي ورور سميع هم ټپي شوى دى.
د دوى په وينا، ماين تر يو پولچک لاندې ځاى پر ځاى شوى و.
بل پلو طالبانو ويلي، چې تېره ورځ ماذيګر يې په نجراب ولسوالۍ اړوند د دره غوث په سيمه کې د کورنيو چارو وزارت د تشخیص د رئيس (جنرال عبدالحکيم) د موټرو په کتار د ماين چاودنه کړې.
دوی زياتوي، چې په چاودنه کې يې ۱ رينجر موټر له منځه وړی او د کابل د پنځلسمې حوزې د آمر په ګډون يې ۷تنه پوليس وژلي دي.
په خبر کې ویل شوي، چې د چټک غبرګون د ټولي قومندان (هارون) په ګډون يې ۴ تنه ټپيان کړي هم دي.
ويل کېږي، چې آمر سميع او جنرال عبدالحکيم دواړه په پارلمان کې د کورني امنيت کميسيون د رئيس (حاجي مراد) ورنه دي.
د کاپيسا نجراب، اله ساى او د تګاب ولسواليو يو شمېر سيمې د طالب وسلوالو په ولکه کې دي، چې وخت ناوخت د دواړو غاړو تر منځ نښته هم رامنځته کېږي.
