(کابل ټکی کام ۱۳۹۵وږی ۲۹) الماس خدرخېل
شاوخوا درې میاشتې وړاندې د ګډحکومت او حزب اسلامي تر منځ د سولې ۲۵ماده لرونکی هوکړه لیک نهايي شو، چې د سولې د عالي شورا له لوري ګډحکومت او حزب اسلامي ته د وروستیو ملاحظاتو لپاره وسپارل شو.
هغه مهال د سولې عالي شورا اعلان وکړ، چې دوه اونۍ وروسته به دواړه لوري د سولې موافقه لاسلیک کړي خو هغسې ونشول او د سولې خبرې له ځنډ او خنډ سره مخ شولې، چې تر دې دمه د ګلبدین حکمتیار په مشرۍ له حزب اسلامي سره د سولې هوکړه تر اوسه نه ده لاسلیک شوې.
د سولې عالي شورا وياند امين الدين مظفري ويلي، چې دا هوکړه ليک به د حزب او ګډ حکومت تر منځ د ټولو ډلو د نظرياتو له اخيستو وروسته لاسليکېږي.
که څه هم یو شمېر سرچېنې وايي، چې اجرائیه ریاست د حزب اسلامي سره د سولې په مخ کې تر ټولو مهم خنډ دی خو ښاغلی مظفري بیا دا ردوي او وايي، چې اجرائيه رياست له حزب سره د سولې د هوکړې مخالفت نه دی کړی.
د اجرائيه رياست مرستيال وياند جاويد فيصل هم وايي، چې له حزب سره د سولې هوکړه روستۍ شوې ده.
د افغانستان د ولسمشر سلاکار فاروق وردګ ويلي، چې هوکړه ليک وروستي پړاو ته رسېدلی او ډير ژر به لاسليک شي.
دا په داسې حال کې ده، چې تېره ورځ د افغانستان د مشرانو جرګې غړو په خپله ناسته کې ویلي، چې هغه کسان دې افشا شي چې له اسلامي حزب سره د سولې د موافقې لاسلیکېدو مخنیوی کوي.
د ګلبدين په مشرۍ د نوموړي حزب پر دې موافقه کړې، چې اساسي قانون او د بهرنیانو اډې به مني، وسله وال به يې وسلې پر ځمکه ږدي او کولی شي د حکومت په امنیتي لیکو کې ځای پر ځای شي.
