(کابل ټکی کام ۱۳۹۵ تله ۴) زرغون خوږیاڼی
تېره ورځ د حزب اسلامي غړیو د ډاکټر عبدالله عبدالله سره په لیدنه کې وویل چې د دولت په څنګ کې به د دولت د وسله والو مخالفینو په ضد جګړه کوو.
د حزب اسلامي د مذاکراتو د هیئت مشرامین کریم او نورو غړو يې له عبدالله عبدالله سره په لیدنه کې وویل، چې مونږ به د دولت په ملاتړد دولت له مخالفانو او د افغانستان ددښمنانو په مقابل کې جګړه کوو.
د اجرائیه ریاست د خبرپاڼي له مخي دا لیدنه پرون د سپیدار په ماڼي کې د حزب اسلامي د لوړ رتبه هیئت سره ترسره شوه ، چې په کې د هیواد پر امنیت او د حزب اسلامي پر راتلونکي بحثونه وشول.
د هیئت رئیس امین کریم همدارازوویل، د اجرائیه ریاست د صادقانه مرستي له امله د دولت اوحزب اسلامی ترمنځ د سولې مسوده لاسلیک شوه.
د حزب اسلامي ګوند غړیو د ډاکټر عبدالله له ټیم څخه مننه وکړه چې د سولې په اړه یې له حزب اسلامي سره نه هیریدونکې مرسته وکړه.
همدا راز د حزب اسلامي پلاوي اجرائیه ریاست ته ډاډ ورکړ، چې د امنیت په تآمین کې به نه ستړي کیدونکي هلي ځلي کوي.
د یادونې وړ ده چې مخکې د حزب اسلامي استازیو د طالبانو او حکومت تر منځ د مستقیمو خبرو اترو او مذاکراتو د زمینې چمتو کولو ژمنې کړې وې، دوی ویلي وو چې تر دې مهاله په واقعي ډول چا د سولې لپاره کار نه دی تر سره کړې، کوم میکانیزمونه چې د طالبانو سره د سولې په اړه تر دې دمه تجربه شوي هر یو پر خپل وار سره د ناکامۍ سره مخ شوی دی؛ خو دا لومړی وار دی چې د حزب اسلامي لوړ رتبه غړي د دولت د وسله والو مخالفینو سره د مخامخ ګړې خبره کوي.
د حزب اسلامي او دولت تر منځ د سولې هوکړه لیک څخه مخکې ارګ ویلي وو، چې د حزب اسلامي هغه غړي چې کاري او نظامي وړتیا ولري د پوځ په لیکو کې به شامل شي.
