فاریاب: د جنبش او جمعیت تر منځ تازه نښتې، ۹ ملکي کسان ټپیان شوي
(کابل ټکی کام ۱۳۹۵ تله ۴) زرغون خوږیاڼی
د فاریاب ولایت امنیتي سرچینو ویلي دي، چې ددې ولایت په پشتونکوټ ولسوالۍ کې د دوستم وسله والو ملیشو او د رباني د جمعیت غړیو تر منځ تازه نښتې شوي چې په کې ۹ ملکي کسان ټپیان شوي دي.
یوې امنیتي سرچینې چې نه یې غوښتل نوم یې څرګند شي وويل، چې تېره شپه د جنبش وسله والو او د جمعیت وسله والو تر منځ د پشتونکوټ ولسوالۍ د هزاره قلعه او زرشويي سیمو کې وسله واله نښته وشوه، چې په کې ۹ ملکي کسان ټپیان شوي دي.
د یادې سرچینې په وینا، جګړه د عبدالرحمن چې په «شمال» سره مشهور دی او نیسم شیرزاد غړیو د بلې ډلې له خلیفه صالح او اعظم پهلوان غړیو تر منځ ونښته چې په کې سپکې او درنې وسلې وکارول شوې او جګړه تر اوسه هم روانه ده.
اوسمهال د جمعیت اسلامي مشر صلاح الدین رباني د افغانستان د خارجه چارو وزیر او د جنبش ګوند مشر عبدالرشید دوستم د ولسمشر اشرف غني لومړی مرستیال دی.
د فاریاب د عامې روغتیا رئيس ډاکټر ثمر ویلي دي چې په دې نښتو کې ۹ ملکي کسان ټپیان شوي دي، چې په کې ۴ ماشومان او یوه میرمنه شامله ده.
ده ویلي چې ټپیان د افغان ترک روغتون ته لیږدول شوي دي، دده په وینا د ۳ ټپیانو روغتیايي حالت نازک دی.
تر اوسه د یادې نښتې په اړه دواړه ډلو څه نه دي ویلي.
