(کابل ټکی کام ۱۳۹۵تله ۶) الماس خدرخېل
د امريکا د مرستو USAID نړيوالې ادارې د افغانستان له حکومت سره د ۱۰۰ ميلون ډالرو مرسته وکړه.
د ماليې وزارت ويلي، چې ياده مرسته به په اقتصادي، کرنې، په حکومتوالۍ کې د اصلاحاتو په موخه په ځانګړي ډول د برېښنا د زياتولو، د ګمرک ښه والي، د مالي نظام ښه والي، د سولې او امنيت په برخه کې د ښځو کاري پلان پلي کولو او د ولايتي بوديجې جوړونې په برخو کې ولګول شي.
د دغې مرستو قرراداد د دوشنبې په ورځ په کابل کې د ماليې وزير اکليل حکيمي او د امريکا پراختيايي ادارې د رئيس ويليام همينک تر منځ لاسليک شو.
د لاسليک پر مهال همينک وويل، دا د هغې ۸۰۰ ميليونه ډالرو مرستې برخه ده، چې د امريکا متحده ايالاتو يې له افغانستان سره د اصلاحاتو په برخه کې د ورکړې ژمنه کړې ده.
د ياد قرارداد د لاسليکولو په وخت کې همينګ وويل: د امريکا له لوري ژمنه شوې چې پيسې به هر کال تر ٢٠١٨ زېږديز کال پورې له ارزونې وروسته افغان حکومت ته ورکول کېږي.
دا په داسې حال کې ده، چې تېره مياشت د سيګار د ادارې مشر جان سوپکو د يو ريپوټ له مخې ويلي و: د امريکا ميلياردونه ډالره کومک چې له افغانستان سره يې کړی دی، دغلته يې د فساد په پراخوالي کې مرسته کړې ده.
په دې وروستيو کې د شفافيت نړيوال سازمان هم ويلي دي، چې افغانستان د نړۍ په ۱۶۶ هېوادونوکې دريم په فساد ککړ هېواد دی.
