سرلیکنه
د ملي يووالي ګډ حکومت چې د ولس د رايو درناوى ېې تر پښولاندې کړ او ټوله نړۍ یې د انتخاباتو د نتايجو پورې وخندوله، بالاخره د جان کيري لخوا د ګډ حکومت په جوړولو سره اشرف غني او ډاکټرعبدالله په عارضي توګه سره جوړکړل شول چې دوه کاله وروسته ېې د لویې جرګې د جوړولو وينا سره هم د جوړښت پر مهال وکړه.
په هيواد کې د ګډ ایتلافي حکومت چې مشران یې اشرف غني او اجرائيه رئيس عبدالله دي دا دی دوه ورځې کم دوه کاله ېې پوره کيږي چې د ولسي جرګې غړو، افغان ولس او حامدکرزي په وينا د دوه کلونو په تيريدولو سره د ګډ حکومت مشروعيت پای ته رسيدلی دى.
حامدکرزي په يوه وينا کې ويلي چې په داسې حالاتو کې چې افغان ولس ورسره مخ دى بايد لويه جرګه را وغوښتل شي.
د ګډ حکومت دواړه خواوې ويره لري چې يو شمير کړۍ د حکومت پر خلاف پارونې ليکنې او ځینې افغان ګوندي مشران د حکومت پر خلاف پاڅون ته هڅوي؛ خو حامدکرزي په ډاګه ويلي چې هیڅکله هم واک ته د راګرځېدو هوډ نه لري؛ خو ولسمشرغني او اجرائیه رئیس چې کومې ژمنې کړې وې، د هغوی عملي کېدل، ملي حاکمیت او ملي یووالي خوندیتوب غواړو.
د حامدکرزي له وينا دا څرګنديږي چې کوم خونديتوب مونږ غواړو دا خونديتوب په دې نازکو حالاتو کې بايد وغوښتل شي که د ولس سر او مال خوندي نه وي اوسنی حکومت چې مشروعيت یې پای ته رسيدلی يواځې ددې حکومت په نامه واکمن نه بلکې افغان سياستوال هم د ولس په وړاندې ګرم او بې ځوابه دي.
که څه هم د ګډ حکومت مشروعيت پای ته رسيدلی دى په همداسې حالاتو کې چې ولس د يوه نامشروع حکومت ترسيوري لاندې ژوند کوي د ګډحکومت دواړه مشران بايد د ولس غوښتنې ومني.
که ډاکټر عبدالله دا وايي چې د ګډ حکومت پرځای د نوي حکومت سوچ يو خو ب دی، نو نامشروع حکومت هم يو خوب دی! په هغه حکومت کې چې د ولس د رايو درناوی وجود ونه لري او د اقتدار د ويش په جګړو کې ولس سوځيږي ولس، پارلامان او حامد کرزی مجبوردی چې د لویې جرګې د رابللو غوښتنه وکړي.
څه موده د مخه ډاکټر عبدالله له اشرف غني څخه خپله نارضايتي څرګنده کړه، چې بيا یې سره ليدنه هم وشوه؛ خو دا چې دوی په هيواد کې د روانو حالاتو د کنترول وړتيا نه لري د حامدکرزي په څېر ډير افغان سياستوال او ګونډي مشران به د ګډ حکومت د مخالفت کمپاين پيل کړي.
که دواړه مشران ولس ته د بروکسل د غونډې په څېر د نورو غونډو تمه ورکوي او افغانان لاس ترځنې کښينه وي دا به د افغان ولس لپاره د وخت ضايع وي نه د ستونزو د حل.
ډاکټر عبدالله به د نامشرع حکومت لپاره د پنځه کاله وخت وينا کوي؛ خو دا د هغه خپله خبره ده نه د ولس خبره. ولس وايي نور د ګډحکومت په نامه چې هرڅو پلمې جوړې کړای شي د ولس سره دوکه ده، ګډ حکومت د دومره ستونزو سره مخ دى چې پنځه کاله هيڅ وخت نه شي پوره کولای.
