(کابل ټکی کام ۱۳۹۵ تله ۶) زرغون خوږیاڼی
د ننګرهار ولایت په بهسودو ولسوالۍ کې د امریکا د څارګرې ادارې یوه بې پیلوټه کشفي الوتکه نسکوره کړې ده.
د ننګرهار یوه امنیتي چارواکي چې نه یې غوښتل نوم یې څرګند شي وويل، چې پرون د بهسودو ولسوالۍ اړوند د امریکایانو یوه وړه بې پیلوټه الوتکه نسکوره شوې ده، ده له نورو معلوماتو ورکولو څخه ډډه وکړه.
بلخوا طالبانو په یوه خبر کې ویلي دي چې ددوی ځواکونو د ننګرهار ولایت د بهسودو ولسوالۍ په میرانو سیمه کې د امریکایانو یوه بې پیلوټه کشفي الوتکه په یوه رسا برید کې وویشتله، چې ځای پر ځای نسکوره شوه.
طالب ویاند ذبیح الله مجاهد وايي چې اوسمهال ویشتل شوې امریکايي الوتکه د طالبانو په لاس کې ده.
یاده الوتکه د امریکايي ځواکونو بې پیلوټه کوچنۍ الوتکي دي چې په ریموټ کنټرول سره پرواز کوي او په سیمه کشفي او استخباراتي چارې پر مخ بیايي.
تر اوسه بهرنیو ځواکونو په دې اړه څه نه دي ویلي.
