(کابل ټکی کام ۱۳۹۵تله ۷) الماس خدرخېل
هند او بنګله دېش ويلي، چې د سيمه ييزو همکاريو سازمان سارک په غونډه کې به ګډون نه کوي.
ټاکل شوې ده، چې د سارک غونډه د پاکستان پلازمينه اسلام اباد کې د نومبر پر نهمه او لسمه وشي.
د هند خبري اژانس پي اي ای ويلي، چې د هند د بهرنيو چارو وزارت د دې خبرې تائيد کړی دی.
د سارک غونډې مشرۍ لرونکی هېواد نېپال هم هندي چارواکو له خپلې پرېکړې خبر کړی دی.
په همدې تړاو نوي ډېلي نېپالي چارواکو ته ویلي” یو هیواد داسي وضعیت جوړ کړی چې د غونډې لپاره مناسب نه دی”
همداراز د بنګله دېش د بهرنیو چارو وزیر شهریار عالم، پریس خبري اژانس ته ويلي،چې د دغه هېواد استازي به د سارک په ناسته کې ګډون نه کوي.
د فرانس پريس خبري اژانس له قوله، افغانستان او بوټان هيوادونه هم ښايي د سارک په ناسته کې ګډون ونه کړي.
افغانستان او بوټان تر دې دمه رسما د سارک په ناسته کې د ګډون او نه ګډون په اړه څه نه دي ویلي.
هند تر هغه وروسته په سارک ناسته کې د ګډون څخه انکار وکړ، چې په کشمیر کې د هند په پوځ خونړی برید وشو او لږ تر لږه ۱۸ هندي پوځيان په کې ووژل شول، خو پاکستان د هند توورنه رد کړي او ویلي یې دي چې دغه هېواد غواړي د کشمیر د وروستي تاوتریخوالي څخه د نړۍ مخ واړوي.
له بل پلوه، د پاکستان د بهرنيو چارو وزارت وياند نفيس زکريا په خپل ټويټر ليکلي، له هند يې د دې پرېکړې هيله نه کېده هغه وايي چې نوي ډيلي چارواکو په دې تړاو له اسلام اباد سره رسمي اړيکه نه ده نيولې.
نفيس زکريا لیکلي، د هند د بهرنيو چارو وزارت له ټوېټ له لارې دوی خبر شول، چې نوی ډيلی په سارک غونډه کې ګډون نه کوي.
بايد وويل شي، سارک غونډه د جنوبي اسیا د ۸ هېوادونو د مشرانو ناسته ده چې په هرو دوو کلونو کې ترسره کیږي.
