(کابل ټکی کام ۱۳۹۵تله ۸) الماس خدرخېل
د امريکا دفاع وزير ويلي، چې د موصل ښار جګړې لپاره به سلګونه عسکر عراق ته ولېږو ترڅو له داعش نه نوموړی ښار بېرته نيولو کې له عراقي پوځيانو سره مرسته وکړي.
دفاع وزير اشټن کارتر ويلي، چې تر ۶۰۰ زيات پوځيان به عراق ته د داعش ډلې پر خلاف واستول شي، ترڅو د موصل ښار له يادې ډلې وژغوري.
په ورته وخت کې د عراق لوړ پوړي نظامي چارواکي په دې کوښښ کې دې، چې له ژمي مخکې د موصل ښار د بيا نيولو عمليات پیل کړي.
کارتر نيومکريکو ايالت کې رسنيو ته وويل، چې دغه امريکايي پوځيان به له عراقي ځواکونو سره د اکمالاتو، استخباراتو او پلانونو جوړولو برخه کې مرسته وکړي.
د دفاع وزارت يوې سرچينې ويلي، چې عراق ته د تازه دمو تلونکو پوځيانو شمېر ۶۱۵ تنه دی.
بلې خوا ته د عراق د لومړي وزير حیدرالعبادي ادارې ویلي، چې بغداد له واشنګټنه غوښتي، چې په عراق کې د خپلو پوځیانو شمېر زیات کړي.
د يادونې ده، چې موصل ښار په ۲۰۱۴م کال کې داعش ډلې ونيو.
شنونکي په دې باور دي، چې امريکايي ځواکونه به د موصل تر نيولو وروسته په عراق کې خپلو عملياتو ته ادامه ورکړي.
