د کوليسټرول (د وينې غوړ) کمولو څو اسانه لارې چارې

کابل ټکی کام ۱۷ زمری ۱۳۹۴   د کوليسټرول (د وينې غوړ) ډېروالی د انسان بدن ته ډېر تاواني دی، بلکې شونې ده د انسان ژوند ژر پای ته ورسوي، خو له دې سره سره هم خلک له هغو عادتونو او خوړو لاس نه نيسي، چې کولېسټول زياتوي، خو که لږه هڅه وشي، کېدای شي له دې خطرناکې ناروغۍ بچ پاتې شو، په دې اړه په راتلونکو کرښو کې څو داسې لارې چارې ښودل شوې دي، چې په ترسره کولو يې دغه ناروغي مهار کېدای شي. له سګرټو لاس واخلئ: د ډاکټرانو د وينا مطابق سګرټ پرته له دې چې په بدن کې د وينې غوړ زياتوی، د انسان بدن ته نورې ډېرې ناروغۍ هم راولي. ډاکټران وايي، د سګرټو په پرېښودو انسان له ګڼو وژونکو ناروغيو ژغورل کېږي، چې په هغو کې د زړه ناروغيانې، د سږو خرابي، د وينې فشار او کولېسټرول هم شاملې دي. هره ورځ ۳۰ دقيقې تمرين: روغتيا پوهان وايي، هره ورځ ۳۰ دقيقې ورزش له انسان سره د ويني د غوړو په کمولو کې کافي مرسته کوي او دغه مقدار مناسب ساتي، همدا راز روزمره دومره تمرين کول بدن له چاغوالي هم ژغوري. وزن کم کړئ: د ډاکټرانو په وينا د مسلسل تمرين پر مټ له ۳ څخه تر ۵ کلو وزن د کمولو په مرسته د کولېسټرول اندازه برابره پاتې کېږي، همدا راز د وزن په کمولو ژوند صحتمند کېږي، ډاکتران توصيه کوي، چې د ستړيا پر مهال د خوراک پر ځای قدم ووهئ او د پورته ختو پر مهال د لفټ پر ځای له زينو کار واخلئ، هغوی زياتوي چې هره ورځ ۴۰ دقيقې تمرين له ۵ تر ۱۰ سلنې د کولېسټرول په کمولو کې مرسته کوي. د ژوند په ډول کې بدلون: ډاکټران د وزن کمول د کولېسټرولو د کنترول لپاره خوار مهم بولي، ځکه نو توصيه کوي، چې انسان د خپل خوراک پر عادت غور وکړي او د بدلولو هڅه يې وکړي، او داسې خوراکي توکي د خپل خوراک برخه وګرځوي، چې د وزن په کمولو کې مرسته کوي. ډېر لږ کولېسټرول روغتيا ته ګواښ دی: يو لور ته که د وينې د غوړو ډېره اندازه روغتيا ته ګواښ پېښوي، بل لور ته يې ډېره کمه اندازه هم د انسان روغتيا ګواښي، ډاکټران وايي، که کولېسټول له ۱۶۰ اېم جي، يا ډي اېل نه ښکته ولاړ شي، له دې څخه د کېنسر، لوړ فشار او په زنانه و کې له وخته مخکې د بچي زېږون پېښې رامنځته کېدای شي. کوچنيانو هم په دې ناروغۍ اخته کېدای شي: د ډاکټرانو په وينا د چاغو او د زړه په ناروغيو د اخته کورنيو آن دوه کلنو کوچنيانو ته هم دغه ناروغي رسېدای شي، ځکه نو بايد په خوراک غور وکړای شي.