کابل ټکی کام ۱۳۹۵تله ۱۵) الماس خدرخېل
په کندهار کې يوه سوداګر د مېوې د معياري بسته بندۍ او پروسس فابريکه جوړه کړې ده او په دې فابريکه کې يې پنځه ميليونه ډالره پانګونه کړې ده.
د تجارت او صنعت چارواکو په وينا، چې د هېواد په کچه د خپل ډول لومړنۍ فابريکه ګڼل کېږي.
د کينډا فروټ فابريکې مسوول سعد الدين سعيد پژواک اژانس ته ويلي، کندهار د طبيعي تازه مېوې (انګور، انار، انځر، زردالو او نورو…) مرکز دى، خو د دغو مېوو د صادرولو په برخه کې ګڼې ستونزې موجودې وې.
د سعيد په خبره، دغه فابريکه په نړيوال معيار جوړه شوې ده، چې په کې د انګورو، انارو، انځرو، زردالو، مڼو او نورو مېوو د بسته بندۍ او فري کولينګ چارې ترسره کېږي.
نوموړي زياته کړه، چې د فابريکې اړوند يوه بله برخه چې د انار دانې او له انارو څخه د جوس ايستلو ده، په روان کال کې فعاله او پرانيستل شي.
ده ويلي، د دې برخې له فعاله کېدو سره به وکړاى شي، چې د ثابتو انارو تر څنګ د انارو تازه دانې او جوس هم پروسس او بهر ته صادر کړي.
سعيد وويل، چې سږ کال يې په نمونوي توګه له ٢٠٠ ټنه څخه ډېر انګور، چې په معياري توګه بسته بندي شوي وو، هندوستان او متحده عربي اماراتو ته صادر کړي، چې د پخوا په پرتله په دوه برابره بيه وپلورل شول.
د ده په وينا، د يادو شوو هېوادونو په مارکېټونو کې د کندهار د انګورو پېکنګ ډېر وستايل شو او ان هغوى باور نه شواى کولى، چې دا دې د کندهار انګور وي او په دومره معياري بڼه دې پېک شوي وي.
نوموړی هيله څرګندوي، چې د کندهار د مېوې د بسته بندۍ له معياري کېدو سره به اوس وکولى شي، د دغه ولايت انګور، انار او نورې مېوې د اروپا او امريکا تر مارکېټونو هم ورسوي.
په ورته وخت کې د پکتيا د تجارت اوصنعت د رياست مسؤلينو ازادۍ راډيو ته وويل، چې په روان کال کې د دې ولايت د مڼو حاصلات ۲۰ زره ټنه ته رسېږي.
د دې رياست رئيس نصير احمد عالميار وايي، چې د سړو خونو د نه شتون له امله يې هر وخت په زياته کچه مېوې له خوراکه او بهر ته له صادريدو پاتيږي، چې له امله يې بزګرو ته مالي زيانونه رسيږي.
هغه له مرکزي حکومته غوښتنه وکړه، چې په دې ولايت کې ورته د ميوو د تازه ساتلو لپاره سړې خونې جوړې کړي
