(کابل ټکی کام ۱۳۹۵تله ۱۷) الماس خدرخېل
په پاکستان کې د مېشتو افغان کډوالو په اړه د افغانستان، ايران، پاکستان او د ملګرو ملتونو د کډوالو ادارې UNHCR په څلور اړخيزه غونډه کې د پاکستان د کډوالو چارو وزير عبدالقادر بلوچ وويل، چې د ۲۰۱۶م کال د دسمبر مياشتې له لومړۍ نېتې د ۲۰۱۷کال مارچ مياشتې تر پېله به د افغان کډوالو د ويستلو لړۍ ودروي.
عبدالقادر بلوچ له پاکستان څخه د افغان کډوالو د راستنيدو د ځنډولو لامل د ژمي رارسېدل او د هوا سړيدل ښودلي دي .
هغه دا خبرې په جېنيوا ښار کې د کډوالو په اړه څلور اړخيزې جوړې شوې غونډې ته وکړې او زياته يې کړه، پاکستان ژمن دى، چې پر افغان کډوالو به هېڅ راز فشار نه راوړي او ډاډ ورکوي، چې د بېرته تګ پروسه به د عزت، امنيت او احترام په رڼا کې پاى ته ورسېږي.
بلوچ وويل، چې پاکستان د افغان کډوالو د ستندېدلو په برخه کې همکاري کوي او د افغان حکومت سره په توافق به دا پروسه مخته وړي.
په دغه څلور اړخيزه غونډه کې د م م د کډوالو چارو ادارې مشر فليبو ګرانډي له پاکستان او ايران څخه غوښتنه وکړه، چې د کډوالو په ستنولو کې دې نړيوال قوانين مراعات کړي.
په غونډه کې اجرائيه رئيس عبدالله عبدالله وويل: افغان کډوالو ته بايد مناسب وخت ورکړل شي ترڅو خپل تجارتي، فاميلي او نور کارونه په ډاډه زړه پای ته ورسوي.
د ايران د کورنيو چارو وزارت مرستيال حسين ذوالفقاري په خپله وينا کې وويل، ((د کډوالو د نه ستنېدو علتونه دې وپلټل شي او اړوندې نړيوالې ادارې دې له خپلو مسؤوليتونو سره سم عمل وکړي، ترڅو دغې ستونزې ته اساسي حل لاره وموندل شي)).
په افغانستان کې د کډوالو چارو وزارت وايي، چې سږ کال هېواد ته له ايران او پاکستان نه ۴ لکه کډوال راستانه شوي دي.
بايد وويل شي، چې په هېواد کې امنيت، سرپناه، روغتيايي مرکزونه نه لرل، د ښوونې او روزنې د امکاناتو نشتوالى هغه ستونزې دي، چې له ايران او پاکستان څخه راستانه شوي افغان کډوال ورسره مخامخ دي .
