(کابل ټکی کام ۱۳۹۵ تله ۱۹) زرغون خوږیاڼی
د افغانستان د مالیې وزارت د تورخم او بولدک پوله باندې دګمرک چارواکو ته امر کړی و، چې له پاکساني او افغاني سوداګریزو لاریو څخه د خاک پولي په نوم مالیه واخلي.
د ولسمشر ډاکټر اشرف غني په ځانګړي فرمان په پاکستانيو سوداګریزو لاريو لګول شوې مالیه ختمه شوه.
د افغانستان د سوداګرۍ او صنایعو خونې مرستیال خان جان الکوزي په وينا، ولسمشر غني د تورخم او بولدک چارواکو ته امر کړی چې له پاکستانیو ټرکونو د دغې مالیې اخیستل دې ودرول شي.
ولسمشر اشرف غني دا امر وروسته له هغه وکړ، چې د ډیورنډ کرښې دې غاړې ته د سوداګریزو لاریو چلوونکو درې ورځینې لاریون وکړ او خپلې سوداګریزې لارۍ یې د احتجاج په توګه ودرولې وې.
په پوله باندې د لاریو اتحادیې غړو ویلي وو، چې له تیرې پنج شنبې راهیسې د خاک پولۍ به نامه پیسې اخستل پیل شوي او دوی يي د ورکړي توان نه لري.
د پاکستاني سوداګریزو لاریو چلوونکو په خبره، په تورخم او چمن دروازه باندې افغان چارواکي ورڅخه په یوه ټرک (۵۰۰۰) افغانۍ مالیه اخلي، خو د افغانستان له ټرکونو یواځې (۲۵۰۰) افغانۍ مالیه اخیستل کیږي.
دتورخم او بولدک د لارې د مالیې چارواکو بیا ویل، چې د افغانستان له ټرکونو همداسې نورې ماليې هم اخیستل کېږي، چې تر پنځه زره افغانيو هم اوړي.
پر چمن او تورخم دروازه هره ورځ په سلګونو هغه ټرکونه افغانستان ته راځي، چې په مېوو، سبزیو او نورو خوراکي توکیو بار وي.
بي بي سي ته د سوداګرۍ او صنایعو خونې مرستیال خان جان الکوزي وویل، چې د ډيورنډ په کرښه د پاکستان د مالیې چارواکي تل د افغانستان له سوداګریزو لاریو څخه په یوه بل نامه لږ تر لږه ۳۰ زره پاکستانۍ کلدارې اخیستل کېږي او باید هغوی هم اوس د افغانستان له ټرکونو څخه د دغو پېسو اخیستل پرېږدي.
