کابل ټکی کام ۲۸تله/۱۳۹۵، احمدالله مهاجر
په کابل کې د یوناما دفتر له خوا د تېرو ۹ میاشتو په اوږدو کې د ملکي پېښو په اړه راپور خپور شوی دی، چې د ملکي پېښو ۶۳ سلنه پړه یې پر طالبانو او ۲۳ سلنه پړه یې پر افغان حکومت ور اچولې ده.
طالبانو د یوناما دغه راپور یو طرفه بللی او په کلکه توګه یې رد کړی دی.
طالبانو ویلي دي، چې د دوی مشرتابه د ملکي پېښو د مخنیوي لپاره په لوړه کچه یو با صلاحیته اداره رامنځته کړې ده او خپلو جنګیالیو ته یې په اړه ارزښتناکې توصیې کړي دي.
طالبانو ویلي دي، چې د یوناما راپور کې د کابل ادارې «ظلمونو او وحشتونو» ته نه دي کتل شوي او د دوی پر ملکي پېښو سترګې پټوي.
طالبانو د یوناما د راپور په غبرګون کې د امریکایي ځواکونو له خوا بمباردونه او د درندو وسلو استعمال، د کابل ادارې د عسکرو او پولیسو له خوا د ولسي وګړو پر ګڼو کليو، کورونو او عامه تأسیساتو د توغندیو او ثقیله وسلو استعمال، د امریکایي او د افغان عسکرو له خوا د خلکو پر کورونو او کلیو شپنۍ چاپې اچول، د کندوز په وروستیو پېښو کې د افغان ځواکونو له خوا ګڼ مارکېټونه او دوکانونه سوزول، سلګونه کورونه بمبارول یا هم په توغندیو ویشتل او د دوستمي ملېشو له خوا د ولسي خلکو پر خلاف عملیات کول د مثال په توګه یاد کړي دي.
«دیوناما لخوا د امریکایانو په حملو او بمبارونو سترګې پټول، او دکابل ادارې د وحشتونو کچه ټيټه ښودل، دخلکو په سترګو کې خاورې شیندل دي، سره له دې چې عام افغانان د دښمن ظلمونه دسر په سترګو ګوري .
اسلامي امارت خپل ولس او بشري نهادونو ته ډاډ ورکوي چې د ملکي تلفاتو د مخنیوي په برخه کې به تر خپله ممکنه وسه پوره هڅه کوي، خو داهم خلکو ته واضح کوو چې دیوناما په یولوریز راپور تیر نه وزي، ځکه دا راپورونه د دښمن سره په مشوره دهغو په ګټه خپریږي او دهغو لپاره د تبلیغاتي کمپاین حیثت لري».
