(کابل ټکی کام ۱۳۹۵ تله ۲۸) زرغون خوږیاڼی
د پکتیا د پوهنې ریاست چارواکو ویلي دي، په زرمت ولسوالۍ کې افغان عسکرو د باتور ښوونځي یو زده کوونکی لومړی بربنډ کړی او بیا یې ترې عکسونه اخیستي، چې په غبرګون کې یې شپیته ښوونځي تړلي دي.
یوه ورځ وړاندې په زرمت ولسوالۍ کې د باتور ښونځي ته د ملي اردو عسکر ورغلي وو او دغلته يې د یو زده کوونکي سپکاوی کړی و، چې د ښوونځي زده کوونکو د غبرګون په کوشش سره پرې د یادو ځواکونو قومندان سید عارف سیرزاد ډزې وکړې او دوه زده کوونکي يې ټپیان کړل.
د پکتيا د پوهنې رئيس لقمان حکيم حکيمي رسنیو ته ویلي، دغه شپینه ښوونځي يې وروسته له هغه وتړل، چې د تیرې دوشنبې په ورځ د ځانګړو ځواکونو قوماندان شېرزاد د زرمت ولسوالۍ اړوند د باتور په نوم ښوونځي کې د ټوپک په زور په عام محضر کې له يوه زده کوونکي څخه بربنډ عکسونه اخيستي او وروسته يې ډزې کړې دي.
د سیمې ځايي اوسیدونکو له دولت څخه د قومندان سید عارف د محاکمه کولو غوښتنه کړې ده، ددوی په وینا که دولت دغه کار ونه کړ بیا دوی په خپله د دغه قومندان په خلاف وسله پورته کوي او د زده کوونکي په څیر عمل به ورسره کوي.
حکیمي ویلي، چې ټپي شوي زده کوونکو څخه یو یې د سختو ټپونو له امله د کابل ښار ابن سینا روغتون ته لیږدول شوی او دویم یې دګردیز په عامه روغتون کې بستر دی.
نوموړي اشنا رادیو ته وويل: “تر هغه چې دغه کس ونه نيول شي او په سزا ونه رسول شي، زموږ د زرمت ولسوالۍ ټول ښوونځي به تړلي وي، په دغه ښوونځیو کې تر ۳۵ زره ډېر زده کوونکي په زده کړو بوخت وه، چې اوس په کورونو کېناستل”.
د زرمت ولسوال کپتان اخلاص رسنیو سره په خبرو کې پيښه تاييد کړه، د ولسوال په وینا یاد قومندان نیول شوی او تر پلټنو لاندې دی.
ولسوال اخلاص زاته کړه، چې تر دې پېښې مخکې هم قوماندان سيدعارف شېرزاد په ځينو نورو ورته جرمونو کې ښکېل بلل شوی او د هغه د نيونې په اړه يې مرکزي حکومت ته هم خبر هم کړی و.
همدارنګه د پکتیا د والي ویاند نقیب احمد اتل هم پيښه تاييدوي او وايي چې قومندان عارف نیول شوی او تر څیړنو وروسته به ورته د قانون مطابق سزا ورکړل شي.
