( کابل ټکی کام ۱۳۹۵ تله ۳۰) زرغون خوږیاڼی
د جوزجان ولایت د والي ویاند ویلي، چې ددې ولایت د فیض اباد ولسوالۍ لپاره د طالبانو نومول شوی ولسوال وژل شوی دی.
د والي ویاند محمد رضا غفوري ویلي دي، چې د طالبانو ولسوال ملنګ روحاني د خپلو ۵ ملګرو سره وروسته له هغه ووژل چې کله دوی په سیمه کې د پاڅون کوونکو پر پوستو بریدونه وکړل.
ویاند زیاتوي چې په دې نښته کې د طالبانو د ولسوال ملنګ روحاني په شمول پنځه تنه نور وسله وال يې وژل شوي، چې جسدونه یې د جګړې په ډګر کې پاتې دي.
دده په وینا په سیمه کې اوس هم سخته جګړه روانه ده، ویاند وايي چې تر اوسه پورې دوه افغان عسکر ټپیان شوي دي.
بلخوا طالبان وايي په یاده ولسوالۍ کې یې له دولتي عسکرو ۲ پوستې او یو شمیر نظامی مهمات نیولي دي.
طالب ویاند ذبیح الله مجاهد په خپره شوې خبر پاڼه کې ویلي، چې نن سهار وختي د جوزجان ولایت د فیض اباد ولسوالۍ اړوند کوکلداش سیمه کې په دولتي پوستو بریدونه تر سره شول، چې په نتیجه کې ۲ پوستې د طالبانو لاسته ورغلې.
طالب ویندوی وايي، په دې نښتو کې ۳ پولیس وژل شوي چې جسدونه یې د جګړې په ډګر کې پاتې دي.
دوی په دغه پوستو کې د یو لړ نظامي مهاماتو د نیولو خبر هم ورکوي، چې ۱ میل پیکا ماشیندار، ۱ میل خفیف، ۱ میل کلاشینکوف په کې شامل دي.
طالب ویاند وایي، چې جګړه اوس هم دوام لري او تر دې دمه ددوی یو ملګری وژل شوی دی.
