ليک : م خاموش
وړمه ورځ د ارګ لخوا په يوه خپره شوې اعلاميه کې وويل شول، چې طالبان د ګلبدين حکمتيار د سولې تر اثر لاندې راغلي او يو شمير د طالبانو دعالي شورا غړي غواړې د حکومت سره سوله وکړي.
دا اعلاميه د ارګ څخه په داسې حال کې خپره شوه، چې د حکمتيار د سولې پر مهال او د سولې وروسته طالبانو پر کندوز، هلمند، فراه، ارزګان او نورو ولايتونو کې جګړو او بريدونو ته زور ورکړ.
که دحکمتيار د سولې اثر لاندې طالبان راغلي وای نو اوس به په هېواد کې ټول وسله په لاس طالبان حکومت ته تسليم شوى واى ځکه حکمتيار خو د حکومت سره سوله نه ده کړې حکومت ته تسليم شوی دى .
د دوه کالو راپديخوا د حزب اسلامي ټول غړي د حکومت په لوړو او ټيټو پوستونو کې مقرر شوي دي د ٢٠٠٥ ميلادي کال راپديخوا د يوه پروګرام له مخې يوشيمر حزبيان کابل ته د حزب اسلامي په نامه وليږل شول هغوی په حکومت کې ضم شول او پاتې یې د حکمتيار صاحب په مشرۍ د سولې په نامه يوه مياشت دمخه حکومت ته تسليم شول.
طالبانو کې به يو څه سياسي کمزوري وي، چې په يو شمير جهادي مشرانو یې باور لاره، هغه باور دا و چې له يو شمر جهادي مشرانو څخه طالبانو دا تمه درلوده چې د روسانو په څير دې جهادي مشران د امريکا په مقابل کې هم مقاومت وکړي.
خو په افسوس سره د تمې او هيلې برخلاف يو شمير جهادي مشران امريکا سره د افغانانو په وژلو او هيواد ورانولو کې ملاتړي شول.
طالبانو چې څومره پر يو شمير جهادي مشرانو باور لاره همغومره پرې بې باوره شول، ځکه هغوی د امريکايي پوځونو په وسيله د طالبانو د نظام د نسکورولو وروسته د بن دغونډې جوړ شوي حکومت ته تسليم شول.
که د ارګ خپرې شوې اعلاميې ته وګورو نو بيا خو داسې بريښې چې طالبان دې هم د حکمتيار په څيرحکومت ته تسليم شي.
حال دا چې طالبانو د امريکا او ورسره د اشر ګړو هېوادونو د پوځونو په مقابل کې خپل دريځ د جګړو او بريدونو په دوام نور هم پياوړى کړ.
طالبان جګړه نه غواړي سوله غواړي او د يرغلګرو په مقابل کې د خپلې کاملې ازادۍ د ترلاسه کولو لپاره جګړى ته دوام ورکوي .
د طالبانو يو شمير دعالي شورا غړي نه، بلکې ټول طالبان چې په ټول هېواد کې د بن د غونډې جوړشوي حکومت پرخلاف په جګړه بوخت دي، دا ټول د سولې د پاره جګړه کوي، چې بهرني پوځونه له افغانستانه ووځي، پر ولس شپني عمليات بند شي بيا به په ټول افغانستان کې د طالبانو هيله (سوله) پوره شي.
طالبانو ددې د پاره وسله نه ده راخيستې، چې خپل هېوادوال او يا په پوځ کې خپل افغان ځوانان ووژني.
که طالبان خپل افغانان وژني بيا نو سوله د چا لپاره غواړي؟ او جګړه د څه د پاره کوي ؟
که ارګ دې ته خوښ وي، چې حکمتيار د نظامي او سياسي زوال وروسته حکومت ته تسليم شو طالبان به هم تسليم شي، نو ارګ دې په اعلاميو خپل او د رسنيو وخت نه ضايع کوي.
