(کابل ټکی کام ۱۳۹۵لړم ۱) الماس خدرخېل
د عراق د دولت مخالفو وسله والو داعش ډلې د دغه هېواد په جنوب ختیځ کې پر دوهم کردي ستر ښار (کرکوک) له تېرې شپې راهیسې بریدونه پیل کړي دي، چې پکې تر دې مهاله د ۶ پوليسو او څو تنه ايراني انجينرانو په ګډون لسګونه تنه وژل شوي دي.
د راپورونو له مخې د داعش ګڼ شمیر سرتېرو بریدکوونکو، چي باروتي واسکټونه يي اغوستي او سپکو او درنو وسلو سمبال وو د کرکوک په مرکز کي حکومتي ودانۍ او د برق اسټیشنونه تر برید لاندي نيولي دي .
کرکوک د کردانو په لاس کې دی، چې د دغه ښار بېشمرګه ځواکونه په موصل کې د داعش ډلې خلاف جګړه پر مخ وړي.
ځينو لويديځو خبري رسنيو ويلي، چې داعش غواړي د هغو زرګونو ځواکونو پام د موصل له نيولو راوګرځوي چې په هغه ښار کې جګړه مخته وړي.
د کرکوک د پوليسو يو تن مشر رسنيو ته ويلي، چې په دې ښار کې د داعش وسلوالو پر پنځو دولتي ودانیو بريدونه کړي، چې په دغو بريدونو کې د پوليسو مرکزي دفتر هم شامل دی.
وسله والو د کرکوک په لمن کې د برېښنا یو مرکز هم په نښه کړی، چې ویل کېږي دلته ۱۸ امنیتي ځواکونه او د برېښنا د دې مرکز کارګران وژل شوي دي، په وژل شویو کې دوه ایرانیان هم شامل دي.
کرکوک له بغداده د شمال لورې ته ۲۴۰ کيلو متره لرې پروت ښار دی،چې د عراق د تیلو اکثره څاه ګاني همدي ښار کې دي.
د داعش اړوند وسلوالې ډلې د دې بريدونو مسؤليت منلی. په دغه ښار کې نن ورځ هم چاودنې او ډزې اورېدل کېږي.
بل پلو عراقي ځواکونه د موصل د جګړې په تړاو ادعا کوي چې د موصل ښار د نيولو په عملياتو کې يې پرمختګ کړی او ځينې سيمې يې له داعش ډلې نيولي دي.
