(کابل ټکی کام ۱۳۹۵لړم ۱) الماس خدرخېل
د ګارډين ورځپاڼې د راپور له مخې په قطر کې د طالبانو د سياسي دفتر درې غړي د پاکستاني چارواکو سره د خبرو لپاره اسلام اباد ته ورغلي دي.
ګارډين ورځپاڼې ته ځينو سرچينو ويلي، چې د طالبانو د قطر دفتر درې تنه لوړپوړي چارواکي د تېرې چارشنبې په ورځ له دغه هېواد څخه پاکستان ته رسېدلي او غواړي په يو لړ موضوعاتو له پاکستاني چارواکو سره خبرې وکړي.
ويل کېږي په دغه پلاوي کې په پاکستان کې د طالبانو د رژیم پخوانی سفیر شهاب الدین دلاور، د طالبانو د واکمنۍ د مهال د کورنیو چارو وزیر ملا جان محمد او د طالبانو د پوهنې پخوانی وزیر ملا عبدالسلام شامل دي.
په قطر کې د طالبانو يوې سرچینې ازادۍ راډيو ته وویل، چې پاکستان ته تللی دا پلاوی به په پاکستان کې د پاکستاني چارواکو سره د یو شمېر افغان طالب مشرانو پر وروستیو نیونو هم خبرې وکړې.
خو ګارډین ورځپاڼې بیا د طالبانو د دوو لوړ پوړو چارواکو له خولې ویلي، چې له قطر څخه پاکستان ته تللی د طالبانو دا پلاوی به د پاکستاني امنیتي چارواکو سره د افغان حکومت او طالبانو ترمنځ د سولې د احتمالي خبرو اترو پر مسئلې بحث کوي.
بل پلو د طالبانو د رسمي سايټ له لوري د سياسي دفتر په نوم د وروستيو مذاکراتو په اړه يوه اعلاميه خپره شوې، چې پکې ويل شوي دي: له تیرو څو ورځو را په دېخوا د یو شمیر غربي رسنیو لخوا په مکرر ډول آوازې اچول کیږي، چې ګنې د اسلامي امارت استازو د کابل ادارې له استازو سره خبرې پيل کړې او مذاکرات کوي.
په اعلاميه کې راغلي: ((داسې یو بې اساسه راپور وړمه ورځ د ګارډین په نامه یوې غربي رسنۍ او نن ورځ په دوهم ځل د آزادۍ رادیو په نامه رسنۍ د نامعلومه او استخباراتي سرچینو په اشاره خپور کړی چې ګنې د اسلامي امارت استازي په سعودی عربستان کې راتلونکې اونۍ د کابل ادارې له استازو سره لیدنه کوي. موږ دغه افواهات ردوو، اصلا دښمن د جګړې په ډګر کې له وارخطايي او لار ورکۍ سره مخ دی، غواړي د دا ډول مغشوشونکو او بې اساسه راپورونو په وسیله عامه ذهنیت مصروفه کړي)).
دوی زياتوي که د کابل ادارې سره د مذاکراتو په نامه کومه پروسه روانه وی، نو اسلامي امارت به بې له کوم خنډه اعلان کړې وه.
