ولسي جرګې د ولسمشر غني د مخابراتي ماليې فرمان رد کړ
کابل ټکی کام ۲۲میزان/۱۳۹۴
قدرت الله حسین
ولسي جرګې د ولسمشر غني هغه فرمان په اکثريت سره رد کړ، چې له مخې يې د مخابراتي شرکتونو له ګډونوالو ماليه راټولېده.
ولسي جرګې د غني دغه فرمان د اساسي قانون خلاف بللی او رد کړی دی.
د ولسي جرګې وکيلانو ټينګار کړی، چې د اساسي قانونو د ۷۹مې مادې پر بنياد ولسمشر نه شي کولای، چې په مالي او بودجوي اړوند موضوع ګانو کې تقنيني فرمان صادر کړي.
د ولسمشر دغه تقنيني فرمان د ميزان له لومړۍ نېټې نافذ شوی و، چې په لومړيو لسو وروځو کې يې د مخابراتي شرکت د کاروونکو له حسابو ۸۰ مليونه افغانۍ ټولې شوې وې.
ولسي جرګې د ولسمشر پر دغه کار هم نيوکه کړې ده، چې نږدې يوه مياشت يې په غير قانوني توګه د فرمان له مخې له خلکو پيسې شکول شوې دي.
د ولسي جرګې ځنو غړو ويلي دي، چې غني پر دې برسېره ۸ واره نور هم داسې تقنيني فرمانونه صادر کړي دي، چې د قانون خلاف دي.
