ترکيه: د ديار باقر چاودنې مسؤليت اسلامي دولت (داعش) ډلې منلی
(کابل ټکی کام ۱۳۹۵لړم ۱۵) الماس خدرخېل
تېره ورځ د ترکیې د ديار باقر ولايت په باغلر سيمه کې يوه موټر بم چاودنه وشوه.
چاودنه د باغلر ولسوالۍ د امنيې قومندانۍ تر څنګ د سهار ۸ بجو پر مهال رامنځته شوه.
په دې چاودنه کې لږ ترلږه نهه تنه ووژل شول او تر ۱۰۰ زيات يې ټپيان کړل.
د ديارباقر ولايتي چارواکو د چاودنې مسؤليت د پي کاکا پر وسلوالې ډلې اچولی دی.
خو د اسلامي دولت ډلې اړوند خبري اژانس اعماق ویلي، چې د اسلامي دولت يا داعش ډلې وسلوالو د ترکيې په ديارباقر ولايت کې له چاودېدونکو توکو ډکه لارۍ د پوليسو د دفتر مخې ته چوولې ده.
د يادونې ده، چې د اسلامي دولت ډلې مشر ابوبکر البغدادي په وروستي غږيز پيغام کې په خپلو پلويانو غږ کړی و، چې پر ترکيې خپلو بريدونو ته دوام ورکړي.
