(کابل ټکی کام ۱۳۹۵لړم ۱۶) الماس خدرخېل
د پکتيکا امنيتي چارواکو رسنيو ته ويلي، چې په دغه ولايت کې يې طالبانو ته مرګ ژوبله اړولې ده.
په دغه ولايت کې د ملي اردو د پلې لوا قومندان عبدالواسع ويلي، چې د عملياتو پر مهال يې په سيمه کې ۸۶ طالبان وژلي او ۷۶ نور يې ټپيان کړي دي.
بل پلو د نوموړي ولايت چارواکو تېره ورځ رسنيو ته وويل، چې وسلوالو د ياد ولايت د ځينو سيمو د نيولو هڅې کولې چې د دوی امنيتي ځواکونه توانيدلي، دغه سيمې وساتي او د ولسواليو لارې پرانيزي.
چارواکي وايي، په دغه ولايت کې درې ولسوالۍ وړممۍ، تروه او وازيخوا د وسلوالو له خوا له سخت امنيتي ګواښونو سره مخ وې، چې اوس يې له امنيتي ګواښه ژغورلي دي.
د پکتیکا ولایت د امنیه قوماندانۍ د امنیت امر سمونمل عبدالروف مسعود د خپلو سرتېرو د وژلو او ۶ ټپې کېدل مني او وايي چې په وازیخوا، وړممۍ او تروې ولسوالیوکې وسلهوالو مخالفینو ته هم درنه مرګ ژوبله وراړولې ده.
خو بل پلو د وسلوالو طالبانو وياند ذبيح الله مجاهد په يوه خبرپاڼه کې د چارواکو ادعاګانې ردوي او ويلي يې دي، چې (موږ د بزدله دښمن دغه تشې خبرې په کلکه ردوو، له تیرو څو ورځو راهيسې د پکتیکا د تروې او وړممۍ ولسوالیو مرکزونه د مجاهدینو لخوا محاصره شوي چې اوس هم تر بریدونو لاندې دي).
مجاهد زياتوي په يادو نښتو کې يې لسګونه افغان عسکرو ته مرګ ژوبله اړولې ده او د تګ راتګ لارې يې پرې بندې کړي دي.
شاغلی مجاهد په دې نښتو کې د خپلو څلور تنو ملګرو وژل کېدل مني او وايي، چې د ولايت معاون مولوي محمد اقبال ژوندی او روغ رمټ دی.
بايد وويل شي، چې افغان چارواکو ادعا کړې وه چې په دغه ولايت کې يې لسګونه طالبانو ته مرګ ژوبله اړولې ده، خو طالبان وايي چې د دوی دښمن په ياد ولايت کې هغه وړتيا او قابليت نه لري چې د دوی سل تنه ملګري شهيدان کړي.
