(کابل ټکی کام ۱۳۹۵لړم ۱۸) الماس خدرخېل
ټاکل شوې ده، چې د امريکا متحده ايالتونو کې نن سې شنبې د نومبر په اتمه ټاکنې ترسره شي او امريکايان به خپل نوی ولسمشر وټاکي.
په امريکا کې دغه نوی ولسمشر به ۴۵ وي، چې دواړه نوماندان ډونالډټرمپ او هېلري کلينټن يې د ګټلو په تمه دي.
په دواړو کانديدانو کې، چې هر يوه له نيمو ډېرې رايې خپلې کړې، هغه به د امريکا نوی ولسمشر وي. خو که دواړه برابر شول د امريکا د استازو خونه يې بيا د ګټونکي پرېکړه کوي.
که څه هم څو ورځې مخکې د امريکا د اف بي آی ادارې په حواله په ټاکنو کې د احتمالي بريدونو خبر ورکړل شو، خوچارواکي وايي، د امريکا په يو شمېر ايالتونو کې يې ځانګړي امنيتي تدابير نيولي او اضافي پوليس يې ځای پر ځای کړي دي.
دواړو کانديدانو ډونالډټرمپ او هېلري کلنټن له دې وړاندې د جمهوري رياست ګټلو لپاره کلکه مبارزه کړې ده او په يو بل يې سخت انتقادونه هم کړي دي.
په همدې تړاو تېره ورځ ډونالډ ټرمپ په فلوريدا کې هيلري کلنټن په درغلۍ او اداري فساد کې په لاس درلودلو تورنه کړه.
هیلري کلېنټن ۶۹ کلنه ده او په حقوقو کې یې دوکتورا اخیستې، د هغې خاوند بېل کلېنټن د امریکا ۴۲ ولسمشر و .
ويل کېږي که هيلري کلنټن ټاکنې وګټي، د امريکا په تاريخ کې به لومړۍ ښځه ولسمشره وي.
خو د امريکايي رسنيو د راپورونو له مخې شايد پنځه شپېته سلنه امريکايان په دغه ټاکنو کې ونډه واخلي. امريکايي حکومت ټول هېواد کې د رايه اچونې له پنځو سوو ډېر مرکزونه پرانيستي دي.
د امریکا د جمهوري ریاست د انتخاباتو پایلې به د کابل پر وخت سبا د سهار په نهه نیمو بجو اعلان شي.
