ننګرهار: داعش وسله والو يو دينې عالم په ډزو وژلی
(کابل ټکی کام ۱۳۹۵ لړم ۲۹) الماس خدرخیل
د ننګرهار ولايت د روداتو ولسوالۍ اوسېدونکی يو تن ديني عالم د داعش وسلوالې ډلې لخوا وژل شوی دی.
د ننګرهار والي وياند عطاءالله خوګياڼی وايي، چې داعش وسله والو د يادې ولسوالۍ د اخون کلي اوسېدونکی ديني عالم مولوي عبدالصمد له ځان سره له بېولو وروسته وژلی دی.
د ځايي اوسېدونکو په وينا نوموړي څلوېښت کلن ديني عالم کومه دولتي دنده نه درلوده او نه یې کومې وسله والې ډلې سره لاس درلود.
د سیمې اوسیدونکي زياتوي، چې مولوي عبدالصمد د امامت تر څنګ په ځينو مدرسو کې د ښوونکي په توګه دنده ترسره کوله او په سلګونو زده کوونکي یې روزلي دي.
څو ورځې وړاندې د ننګرهار د شينوارو د ديني عالمانو شورا ويلي و، چې داعش وسله والې ډلې په دې ولايت کې د خپل حضور له پیل راهیسې تر دې دمه ۳۶ ديني عالمان په ډزو سره وژلي دي.
د یادونې وړ ده چې داعش افراطي ډله حنفي علماء او مقلدین مشرکان بولي او پر وړاندې یې وسله واله مبارزه کوي.
