د نورستان ولایت چارواکي وايي د دواب ولسوالۍ محاصره يې ماته کړې
(کابل ټکی کام ۱۳۹۵ لیندۍ ۱۴) الماس خدرخیل
د نورستان ولايت چارواکو ويلي، چې د یاد ولايت د دواب ولسوالۍ محاصره يې ماته کړې ده.
د نورستان والي حافظ عبدالقيوم رسنيو ته ويلي، چې تازه دمي ځواکونه ولسوالۍ ته رسېدلي او د نورګرام او دواب تر منځ لاره يې هم پرانيستلې ده.
د يادې ولسوالۍ اوسېدونکي وايي، چې ولسوالۍ اوس هم د وسلوالو طالبانو له لوري محاصره ده او افغان ځواکونه نه شي کولی چې په ډاډه زړه تګ راتګ وکړي.
بل پلو د وسلوالو طالبانو وياند ذبيح الله مجاهد په خپل ټوېټر ليکلي، چې د نورستان په دواب ولسوالۍ کې يې پر دښمن د محاصرې کړۍ دوامداره ساتلې او د تګ راتګ لپاره يې صرف د مريضانو او عامو خلکو لپاره د سپين ږيرو په منځګړيتوب لاره خلاصه کړې ده.
د يادونې ده، چې دواب ولسوالۍ له يوې میاشتې راهيسې د وسلوالو طالبانو له خوا محاصره شوې او په دې موده کې د افغان پوځيانو او وسلوالو طالبانو تر منځ په نښتو کې طالبانو يو شمير پوځيانو د وژلو او د ولسوالۍ د دفاعي پوستو د نيولو خبر هم ورکړی و.
