(کابل ټکی کام ۱۳۹۵ لیندۍ ۲۰) زرغون خوږیاڼی
د جنوبي کوریا پارلمان ددغه هیواد ولسمشره پارک گیون هي د فساد او له خپل صلاحیت څخه په سوء استفادې سره استیضاح او له دندې لرې کړې ده.
د پارلمان ۳۰۰ غړیو لخوا د پارک ګیون هي د استیضاح په ګټه ۲۳۴ رایې اچول شوي، چې د پارک په ګټه یواځې ۵۶ رایې کاریدلي دي، چې رایو په اکثریت سره له دندې لرې شوه.
بلخوا ولسمشره پارک یاده پریکړه نه منلی او قضیه یې د اساسي قانون سترې محکمې ته راجع کړې ده.
پر پارک تور دی، چې خپلې یوې ملګرې «چويي سون سیل» ته یې په جمهوري ریاست کې ځینې واکونه ورکړي دی او ملګرې یې په ګومارنو او ځینو پروژو کې له دې واکونو ناوړه او شخصي ګټه پورته کړې.
له همدې امله په جنوبي کوریا کې په زرګونو کسانو د ولسمشرې خلاف له ډيره وخته په لاریونونو لاس پورې کړی و؛ چې په پایله کې یې پارلمان د ولسمشرې دنده وځنډوله.
د جنوبي پخواني ولسمشران هم په فساد ککړ بلل شوي دي، چې له ۲۰۰۳ز کال نه تر ۲۰۰۸زکال پورې منتخب ولسمشر «رومو هیون» د یو تاجر لخوا په شپږ میلیون ډالرو اخیستلو تورن شوی و، ځان وژنه وکړه.
له دې وروسته له ۲۰۰۸ز نه تر ۲۰۱۳ ز کال پورې منتخب ولسمشر «میونګ بک» مشر ورور په پنځه میلیون ډالر رشوتاخیستلو سره په دوه کلن بند محکوم شوی و.
