(کابل ټکی کام ۱۳۹۵ لیندۍ ۲۰) الماس خدرخیل
د امريکا متحده ايالتونو د مشرانو جرګې په افغانستان کې د امريکايي ځواکونو د شمېرې د زیاتولو او هلته يې د واک د ډېرولو غوښتنه کړې ده.
د تازه ورکړل شويو راپورونو له مخې د امريکا مشرانو جرګې ياده غوښتنه د امريکا نوي منتخب ولسمشر ډونلډ ټرمپ څخه کړې ده.
امريکايي سناتوران وايي، چې په افغانستان کې روان وضعيت ته په کتو بايد چې د امريکايي ځواکونو شميره لوړه او ددوی واکونه ډیر شي.
سناتورانو له نوي منتخب ولسمشر څخه دا غوښتنه هم کړې، چې د افغانستان پر وړاندې بايد خپل سياست روښانه کړي.
په ورته وخت کې سناتور جان مکين د مسلحو ځواکونو د کميټې مشر ويلي، چې د دې لپاره چې د افغانستان جګړه وګټو بايد خپل سرتيري زيات او واکونه يې ډير کړو.
دا په داسې حال کې ده، چې څو ورځې وړاندې د امريکا ولسمشر بارک اوباما په تازه څرګندونو کې ويلي وو، چې په افغانستان کې طالبانو ته ماتې نه شي ورکولی.
شنونکي په دې باور دي، چې امريکايي ځواکونه په افغانستان کې جګړه اوږدولی شي؛ خو له طالبانو جګړه نه شي ګټلی، ځکه چې طالبان د ولس نه جوړه شوې ډله ده او د ولس پراخ ملاتړ لري.
