(کابل ټکی کام ۱۳۹۵ مرغومی ۱۲) زرغون خوږیاڼی
د ترکیې داستانبول په اورتاکوی سیمه کې په یوه نایټ کلب هغه وخت وسله وال برید وشو، چې د نوي کال د لمانځلو لپاره دغلته یو زیات شمیر خلک راټول شوي وو.
سرتیري بریدګر لومړی د نایټ کلب په دروازه کې ساتونکی پولیس وژلی او ورسته نایټ کلب ته ننوتلی او دغلته یې په خلکو ډزې کړي، چې په کې ۳۵تنه وژل شوي او ۴۰ تنه نور ټپیان شوي دي.
د ترکي ټي ار ټي پښتو ویلي، چې د استانبول والي اوصف شاهین دا پيښه تائيد کړې او ویلي يې دي چې د شپې په یوه بجه او ۲۲ منټه یو وسله والو کس د اورتاکوی په سیمه کې یو نايټ کلب«رینانایټ کلب» ته ننوت او ډزې یې پیل کړې، چې پکې د یو تن پولیس په ګډون ۳۵ تنو ژوند د لاسه ورکړی او ۴۰ تنه نور ټپیان شوي دي.
نن د ۲۰۱۷زکال لومړۍ ورځ ده چې په ټوله عیسوي نړۍ کې د نوي میلادي( ۲۰۱۷) لمانځنې روانې دي، چې په ترکیه کې یې دنایټ کلب برید لمانځنه پیکه کړې ده.
د پیښې ځای ته امنیتي ځواکونه او امبولانسونه لیږل شوي دي.
د استانبول والي ویلي، چې د پيښې پلټلو امر یې کړی، چې وسله وال کس په چا پورې تړاو درلود.
ویل کیږي چې په کلب کې ۷۰۰تنه د نوي کال په جشن کې د ګډون لپاره راټول شوي وو.
د ترکیې سي این این تلویزیون ویلي، چې برید کوونکی د پاپا نویل په جامه کې کلب ته ورغلی.
استانبول د هر ډول ممکنه ترهګریز برید مخنیوي په موخه سخت امنیتي تدابیر نیولي وو او په ښار کې شاوخوا ۱۷ زره پولیس په دنده بوخت وو.
تر اوسه ددې وسله وال برید مسئولیت چا نه دی منلی.
تیره ورځ برتانیې د ورته وسله والو بریدونو خبر ورکړی و او چارواکو د کرسمس د لمانځلو د پیلولو پر مهال یې د سختو امنیتي تدابیرو نیولو امر کړی و.
