د چین حکومت د ټایوان په اړه د ټرمپ د خبرو غوښتنه رد کړه
کابل ټکی کام ۱۳۹۵ مرغومی ۲۶) صابر خپلواک
د متحده ایالاتو منتخب جمهور رئیس ډونالډ ټرمپ ویلي دي چې د تایوان او چین تر منځ په خبرو کې به په سیمه کې د امریکا د بهرنۍ پالیسۍ نه کار اخلي خو د چین د بهرنیو چارو وزارت دغه غوښتنه رد کړله.
د چین د بهرنیو چارو د وزارت ویاند لو کانګ د ټرمپ د دې څرګندونو په ځواب کې ویلي دي چې د متحد چین پر سر مذاکرات نشي کیدلی. د وزارت په اعلامیې کې ویل شوي دي چې په هر ډول خبرو کې یوازې د چین خلق جمهوریت حکومت مشروعیت لري.
خو د متحده ایالاتو منتخب جمهور رئیس ډونالډ ټرمپ بیا د همدې تیرې جمعې په ورځ د وال سټریټ ژورنال ورځپاڼې سره په مرکې ویلي دي چې د متحد چین په شمول په ټولو مسایلو خبرې اترې کیدلی شي.
ټرمپ د جمهوري ریاست د انتخاباتو د ګټلو نه ورسته د تایوان د جمهور رئیسي سره هم په ټیلیفون خبرې کړې وې چې چین پرې جدي عکس العمل ښودلی و. دا په تیرو څلویښتو کلونو کې لومړی ځل و چې د امریکا یو منتخب جمهور رئیس د تایوان د رهبر سره رسماً خبرې کوي.
ډونالډ ټرمپ په چین انتقاد کوي چې د شمالي کوریا د مهار کولو لپاره جدي عمل نکوي او د خپل پولي واحد ارزښت قصداً ټیټوي چې امریکایي شرکتونه تاواني کړي. چین تر اوسه د ټرمپ د انتقادونو په ځواب کې جدیت ندی ښودلی خو کارپوهان وایي کله چې هغه سپینې ماڼۍ ته ولاړ شي،د چین عکس العمل به هم بدل شي.
