(کابل ټکی کام ۱۳۹۵مرغومی ۲۹) الماس خدرخېل
د هلمند ولايت لښکرګاه ښار اوسېدونکي وايي، چې وسلوال غله په رڼا ورځ غلاوې کوي او د دوی له هټيو او په لارو کوڅو کې ترې سامان او پيسې په زوره اخلي.
د دغه ښار يو تن دکاندار حاجي خان محمد پژواک اژانس ته وويل، چې دوه ورځې وړاندې يې دکان ته وسلوال غله ورغله، پيسې او نور خوراکي توکي يې په زوره واخيستل، د نوموړي په وينا ومې غوښتل چې مخنيوی يې وکړم نو ټوپک يې راته ونيولو او په وژلو يې وګواښلم.
د دغه ښار يو بل اوسېدونکی توريالی وايي چې: (( ځينې يې د پوليسو په جامو کې وي او ځينې يې بيا په شخصي کاليو کې، وسلې ورسره دي په رڼا ورځ په زوره له دوکاندارانو پيسې او مالونه اخلي.))
همدا راز د لښکرګاه ښار يوه اوسېدونکي جوادزياته کړه، چې تېره ورځ وسله والو غلو د لبناتو په واټ کې د تورټانک په سيمه کې او بيا په کارته لګان سيمه کې له هټېوالو څخه پيسې اخيستې دي.
د دغه ښار سوداګر وايي، چې دغو وسلوالو خلک په اندېښنه کې اچولي او ورځ تر بلې يې شميره ډېرېږي.
که څه هم دوی د امنيتي کسانو د غلو د مخنيوي غوښتنه کوي، خو په ښار کې ځينې خلک بيا خپله پوليس او نامسؤله وسلوال تورنوي چې په دې غلاوو کې لاس لري.
د هلمند د امنيې قوماندانۍ د امنيت امر سمونوال ګلي خان تائيدوي، خو وايي چې په دې اړه پوليسو ته چا شکايت نه دی کړی.
بايد وويل شي، چې په دې وروستيو کې د هلمند ترڅنګ په کابل او ځينو نورو ولايتونو کې هم ورته غلاوې پيل شوې دي او خلکو ته يې ډول ډول اندېښنې پيدا کړې دي.
