(کابل ټکی کام ۱۳۹۵مرغومی ۲۹) الماس خدرخېل
په اسرائيلي مطبوعاتو کې نشرېدونکې يوې مجلې په خپله تازه ګڼه کې له يوه مهم راز څخه پرده پورته کړې او ويلي يې دي، چې د دغه هېواد بې پيلوټه الوتکې به تر ۲۰۱۸ ميلادي کال پورې په افغانستان کې په عملياتو کې برخه واخلي.
د دفاعي چارو متخصصې دغې مجلې ليکلي، چې دغه الوتکې «ههرون ۱» به په افغانستان کې د جرمني ځواکونو له لوري په عملياتو بوختې دي.
د مجلې له قوله جرمني له ۲۰۱۰ کال راپديخوا د يوه اسرائيلي شرکت سره تړون کړی، ترڅو د دوی لپاره بې پېلوټه الوتکې جوړې کړي چې هغوی ترې په عملياتو کې استفاده وکړي.
يادې سرچېنه زياتوي، چې تر اوسه د اسرائیل بې پلوټه الوتکو په افغانستان کې تر ۳۰ زره زیات پروازونه کړي دي، خو دا لا نه ده معلومه چې څومره يې بمبار او څومره يې په کشفي عملياتو کې برخه اخيستې ده.
د مجلې په وينا جرمني اسرائيلي شرکت ته د تړون له مخې ۳۵ ميليونه ډالر ورکړي او نورې به وروسته ورکوي.
مجله ليکي، هر څوک چې دغه الوتکې د اسرائیل څخه اخلي نو اسرائیلي تخنیک کاران هم ورسره استخداموي، خو جرمني دا ځل غوښتنه کړې چې تخنیکي مسؤولیت به یې د دوی پر غاړه وي.
دا لومړی ځل دی، چې په افغانستان کې د اسرائيلي بې پيلوټه الوتکو له فعاليت نه خبر ورکول کېږي، دم ګړۍ د امریکا، ناټو او نورو غیر مسلم هیوادونو په سلګونه بې پيلوټه او ډرون الوتکې په افغانستان کې په بمبارۍ او کشفي برخه کې فعاليت کوي.
