( کابل ټکی کام ۱۳۹۵ سلواغه ۱) صابر خپلواک
د امريکا يوې فډرالي محکمې د امريکا دفاع وزارت (پنټاګون) نه یو وار بیا غوښتي چې په ابو غریب، عراق او افغانستان کې د نورو زندانونو انځورونه ښکاره کړي، ترڅو له بندیانو سره د امريکايي پوځیانو چلند په ډاګه شي.
قاضي «الفین هېلرستين» په منهاټن ښار کې وویل، ښه به دا وي چې تصویرونه راښکاره کړل شي.
د دفاع وزیر اشتون کارتر تر دې مهاله ونه توانید دا کار ترسره کړي .
د هېلرسټین دغه پرېکړه د مدني اتحادیو او د جنګیالو څخه د دفاع ټولنو بریا ګڼل کېږي. دغو ټولنو په ۲۰۰۴م کې یوه دعوه دائره کړې وه چې د اطلاعاتو د ازادۍ د قانون پر بنسټ، په کې د امريکايي زندانونود انځورونو خپرولو تقاضا شوې وه.
په ۲۰۰۴م کال کې د ابوغریب زندان ځېنې خپاره شوو انځورونو وښودله چې له زندانیانو سره په زندانونو کې ډېر ناوړه چلند شوی.
له فزیکي او جنسي ناوړه چلند، برقي شاټونو،پنځه وخته لمانځه ته نه پریښودل او وهمي اعدامونو سربېره په نورو مختلفو شکلونو تعذیب شوي دي.
د کانګرېس د ارشیف او د محکمې د اسنادو له مخې یاد انځورنه تر ۲۰۰۰ پورې اټکل شوي دي، چې تر اوسه يې یواځې ۱۹۸ خپاره شوي دي.
څارنوال لارېنس لاسټبرګ وايي، دغه انځورونه چې زموږ د تاریخ خفه کوونکې پړاواستازيتوب کوي، ټولنه کې خورا د پام وړ دي او تاريخي اهمیت لري. زموږ د دېموکراسۍ په څېر دېموکراسیو کې د عامو خلکو له نظرونو څخه يې پټول نه دي په کار.
د یادونې وړ ده چې په ۲۰۱۵م مارچ کې قاضي هېلرسټین امر وکړ چې د یادو زندانونو ټول انځورونه په ډاګه کړل شي. خو د دفاع وزير کارتر له دې جملې څخه یواځې ۱۹۸ يې خپاره کړل او نور يې له ځان سره پټ وساتل.
