په لومړي ځل د امريکا نه ۹۲ ناقانونه کډوال وويستل شول
(کابل ټکی کام ۱۳۹۵سلواغه ۷) الماس خدرخیل
په همدې تړاو د کينيا د دولت يوه وياند ايريک کيرايثي رسنيو ته ويلي، چې د ويستل شويو کډوالو ۹۰ تنه يې د سوماليا او ۲ تنه د کينيا هېواد وګړي دي، چې نايروبي ته رارسېدلي دي.
نوموړی زياتوي، په داسې حال کې دا کډوال خپلو هېوادونو ته استول شوي چې دوی ته د امريکا د دولت له لوري هيڅ ډول خبرداری نه دی ورکړل شوی.
د رسمي تړونونو له مخې کله هم چې امريکا د کوم هېواد کډوال خپلو هېوادونو ته بیرته ستنوي بايد هغه هېواد ته خبر ورکړي.
د امريکا متحده ايالاتو لا په دې اړه رسمي څرګندونې نه دي کړي.
د يادونې ده، چې د امريکا ولسمشر ټرمپ د انتخاباتي کمپاين پر مهال ژمنه کړې وه، چې د ولسمشر د ټاکل کېدو وروسته به، په امريکا کې ميشت ۳ ميليونه ناقانونه کډوال له هېواده اوباسي او هم به له مکسیکو سره د امریکا پر ګډه پوله دېوال جوړ کړي چې په وینا یې د ناقانونه کډوالو او نشه يي توکو د قاچاق مخه ونیوله شي.
