(کابل ټکی کام ۱۳۹۶ وری ۱۴) محمد طاهر
د ولسي جرګې غړو په نننې غونډه کې وویل، د هېواد لوېشت لوېشت ځمکه د هر افغان ده او هغه کسان چې د ډیورنډ فرضي کرښې په اړه غیر مسوولانه څرګندوې کوي خاینین او وطن خرڅونکي دي.
د دې جرګې غړي لطیف پدرام تیره ورځ رسنیو سره په خبرو کې ویلي و، چې د ډیورنډ کرښه د افغانستان او پاکستان تر منځ رسمي پوله ده.
د جرګې غړو د لطیف پدرام په ورستیو څرګندونو سخت غبرګون ښکاره کړاو له ادارې پلاوي نه يې وغوښتل، چې هغه دې له ولسي جرګې وباسي او اجازه دې نه ور کوي چې نور په دغه جرګه کې ګډون وکړي.
د دې جرګې غړی عبیدالله بارکزی وايي، لطیف پدرام د پاکستان جاسوس دی او تل یې په ولسي جرګه کې د (آی ایس آی) لپاره جاسوسي کړې ده.
دی زیاتوي، پدرام ډیری سفرونه پاکستان ته کړي او د هغې هیواد د استخباراتو لخوا د افغانستان په ولسي جرګه کې ځای پر ځای شوي دی.
