بادغيس: د غورماچ ولسوالۍ دریم ځل د طالبانو په لاس سقوط وکړ
کابل ټکی کام| ۱۳۹۶، غوایی ۱۱- د بادغیس ولایت څخه په تازه ورکړل شويو راپورونو کې ويل شوي چې د دغه ولایت غورماچ ولسوالي طالبانو نیولې او ټولو حکومتي تأسیساتو سقوط کړی دی.
د ځايي خلکو په وینا په دغه ولسوالۍ وسلوالو طالبانو تېره شپه بريدونه پیل کړي و، چې په پایله کې د يې ولسوالۍ مقام، امنیه قومنداني او یو شمېر نورې امنیتي پوستې نيولي او اوس مهال يې په ښار کې د انتن پر پوسته او د ملي اردو په مرکز بريدونه پیل کړي دي.
طالبانو د یوې خبرپاڼي په خپرولو سره د غورماچ ولسوالۍ د نیولو خبر ورکړی، او ویلي یې دي چې د دوی وسله والو ځواکونو د دغې ولسوالۍ مرکز، امنیه قومندانۍ او نورې ګڼې دولتي ودانۍ نيولي او اوس يې په ښار جګړه پیل کړې ده.
د طالبانو ویاند قاری محمد یوسف احمدي رسنیو ته په خپل لیږل شوي پیغام کې ویلي چې د غورماچ ولسوالۍ یې د پسرلنیو «منصوري» عملیاتو په ترڅ کې نیولې او لاهم د دوی پرمختګ دوام لري.
احمدي دغه راز په خپل ټويټر پاڼه ليکلي چې دا اوس د دوي ځواکونو د ښار پر انتن پوستې او د ملي اردو په لوی مرکز بریدونه پيل کړي.
د یادونې وړ ده چې یاده ولسوالۍ دوه ځلي وړاندې هم طالبانو نيولې وه دا یې دریم ځل دی چې دغه ولسوالۍ د وسلوالو طالبانو لاس ته ورځي.
خو په دې اړه تر دې مهال دولتي چارواکو رسنیو ته څه نه دي ويلي.
