(کابل ټکی کام ۱۳۹۶غوایی ۱۳) الماس خدرخېل
د پاکستان پوځ د تحريک طالبان پاکستان هغه څلور غړي اعدام کړي، چې د دې هېواد پوځي محکمو ورته د اعدام سزا اورولې وه.
د دغه هېواد پوځي چارواکي وايي، اعدام شوي کسانو په بريدونو، د امنيتي ځواکونو په وژنو او تښتونو کې ککړ وه چې د پوځي محکمو له خوا پرې د مرګ حکم شوی و.
د پوځ له لوري په خپره شوې خبرپاڼه کې ويل شوي، چې اعدام شوي څلور واړه کسان د تحريک طالبان پاکستان غړي دي.
د پاکستان د پوځ مشر د تېرې میاشت په ۱۹ مه نېټه په لومړي ځل په یو وار د هغو ۳۰ نیول شویو وسله والو د مرګ سزا تائید کړې وه چې پوځي محکمو په مرګ تورن کړي و.
د پاکستان حکومت په ۲۰۱۴ میلادي کال کې په پېښور کې پر پوځي ښوونځي د پاکستاني طالبانو تر برید وروسته، په قانون کې ترمیم وکړ او د وسله والو بريدونو د مخنیوي لپارهیې پوځي محکمې جوړې کړې.
تر دې مخکې هم د پاکستان پوځ د تحريک طالبان پاکستان يو شمير غړي اعدام کړي دي.
