په کراچۍ کې برید دوه پولیس وژلي او یو بل یې ټپی دی
(کابل ټکی کام ۳۱ غوايي ۱۳۹۶) حمزه حسیني
نامعلومو وسلهوالو تېره شپه د سند ایالت په مرکز کراچۍ کې د پولیسو پر یوه موټر برید وکړ، په دغه بریدکې لږ تر لږه ۲ پولیس وژل شوي او ۱ پولیس ټپي دی.
په کراچۍ کې د پولیسو یوه مشر مشتاق مهر ویلي: نامعلومو وسلهوالو د کراچۍ ښار د دهوراجي په بهادر سیمه کې د پولیسو پر یوه موټر برید وکړ؛ برید په داسې مهال تر سره شو چې پولیس په سیمه کې د ګزمې په حال کې وو.
ښاغلي مهر د پېښې په اړه رسنیو ته وویل:
“په لومړنیو تحقیقاتو کې دا معلومه شوې چې دغه برید څلورو کسانو کړی چې په دوو موټر سایکلونو سواره وو او له برید ورسته د پېښې له ځایه تښتېدلي دي. ”
پولیس چارواکو دغه برید په کراچۍ کې د وسلهوالو لهخوا د روانو هدفي وژنو لړۍ بللې او وايي چې د پېښې تحقیقات یې پیل او د بریدګرو د نیولو هڅې روانې دي.
د سند صوبې اعلی وزیر مراد عليشاه او والي په کراچۍ کې پر پولیسو برید غندلی او اړوندو ادارو تهیې د بېړنیو تحقیقاتو امر ورکړی دی.
د یادونې وړ ده چې تر دې دمه د یادې پېښې پړه کومې وسله والې ډلې پر غاړه نه ده اخیستې.
