پوتين: ناټو د امريکا د ګټو لپاره فعاليت کوي
(کابل ټکی کام ۱۳۹۶غبرګولی ۱۴) الماس خدرخېل
د روسيې ولسمشر ولاديمير پوټین وايي، چې ناټو د امريکا د بهرنۍ پاليسۍ آله يا ماشين دی، چې يواځې د امريکا د ګټو لپاره کار او فعاليت کوي.
د سپوټنيک خبري اژانس د خبر له مخې پوتين ويلي چې په ناټو کې متحدين نشته او يواځې خادمين دي.
نوموړی وايي، کله چې يو کوچنی هېواد د ناټو غړيتوب ترلاسه کوي، نو د امريکا غوندې د ستر او طاقتور هېواد په وړاندې نه شي ودرېدلی نو معلومه ده، چې په هغه هېواد کې په اسانۍ سره هرڅه کولی شي، لکه د توغنديو دفاعي سیستونه ځای پرځای کول او د دغه راز نوې پوځي اډې جوړول.
پوتين دغه راز د بطرسبورګ اقتصادي غونډې ته هم ويلي و، چې دوی به د ناټو پر پوځي پراختيا او د الاسکا او جنوبي کوريا په ګډون ځينو هېوادونو کې د دوی پر توغنديو نصبولو چپ پاتې نه شي.
د پوتين په وينا، روسيه د ناټو دغې پرمختګ ته د خطر په سترګه ګوري او د دغو تهديدونو ته د ځواب په ورکولو کې فکر کوي.
