د برتانیا پلازمېنه لندن کې د موټر او چاکو په وسیله د ترسره شویو بریدونو له امله ۷ کسان وژل شوي او ۴۸ نور ټپيان شوي دي.
د لندن پولیس وايي، د شنبې په شنبه یو موټر د لندن برج په سیمه کې پر خلکو ورغلی دی، له دې وروسته ۳ بریدګرو د چړو (چاکوانو) په وسله پر خلکو ګوزارونه وکړل.
له سیمې نه عیني شاهدانو رسنیو ته ویلي چې بریدګرو له یو څو ګوزارونو وروسته د بورو مارکیټ پر لور منډې کړې او وروسته ۳ واړه د پولیسو له لورې ووژل شول. پولیس وايي یوه بریدګر د خلکو د تېر ایستلو لپاره د چاودېدونکي واسکټ په څېر یو څه اغوستی و.
د لندن روغتیایي ټېمونو ویلي، ۴۸ کسان ځايي روغتونونو ته لیږدول شوي دي. ویل کېږي، په ټپیانو کې یو پولیس هم شته خو ټپونه یې ژور نه دي.
دوه اونۍ وړاندې هم د برتانیا په مانچسټر کې پر کنسرټ د برید له امله ۲۲ کسان ووژل شول او لسګونه نور ټپیان شول. داعش ډلې د مانچسټر د برید پړه پر غاړه واخېسته، خو د پروني برید پړه تر دې دمه نه ده منل شوې.
