ویل کېږي چې، نن ورځ د کندهار ولایت په غورک ولسوالۍ کې طالبانو ۶۲ عسکر، پولیس او اربکیان چې د بېلابېلو جګړو پر مهال نیول شوي و له بنده خوشي کړي دي.
د طالبانو ویاند، قاري محمد یوسف احمدي رسنیو ته په یوه لېږل شوې خبر پاڼه کې ویلي، یاد بندیان د دوی د مشر ”عالیقدر امیرالمؤمنین هبة الله اخندزاده“ د حکم له مخې بخښل شوي دي. خبر پاڼه کې راغلي چې له خوشي شویو دولتي سرتېرو نه ”کلک ضمانتونه“ اخېستل شوي چې بیا به د حکومت په لیکو کې دندې نه ترسره کوي.
د سیمې خلک وايي، طالبانو له خوشي کولو وروسته ټولو دولتي عسکرو ته د لارې خرڅ او کرایه ورکړې او خپلو کورونو ته یې لیږلي دي.
تر دې وړاندې هم طالبانو لسګونه عسکر په ډله ییزه توګه بښلي او له کلکو ضمانتونه وروسته یې خپلو کورونو ته لېږلي دي. وسله والو طالبانو خپلو جنګیالیو ته ویلي چې ”د دښمن له نیول شویو او ژوبل شویو جنګي افرادو سره به د اسلامي او انساني چلند په کولو سره د هغوی د ژغورنې او بشري حقونو د رعایت خاص خیال ساتل کیږي.“
د طالبانو له لورې د دولتي سرتېرو بښل او خپلو کورونو ته یې لېږل د دې لامل شوي چې زیات شمېر سرتېري خپلې دندې پرېږدي او له طالبانو سره یو ځای شي.
طالبانو د خپلو نویو پسرلني عملیاتو د پیل په اړه په خپره شوې اعلامیه کې ویلي و، چې د هرې ولسوالۍ د رسمي تشکېلاتو تر څنګ به د جلب او جذب کمیسون څانګه ته هم ځانګړې پاملرنه کېږي چې د یادې څانګې په وسیله به د دولت له لیکو نه د سرتېرو د راایستلو او له دوی سره د یو ځای کېدلو هڅې کېږي.
